Римӧ 16 - Коми Библия 2023

Римсаяслы чолӧмъяс

¹ Ме тӧдмӧда тіянӧс Фива чойкӧд. Сійӧ Кенкреяын вичкоса отсасьысь.

² Сибӧдӧй сійӧс Господь нимсянь, кыдзи лӧсялӧ вежа войтырлы. Быд ногыс отсалӧй сылы, кор ковмас сылы отсӧг. Ачыс ӧд сійӧ уналы отсаліс, тшӧтш меным.

³ Висьталӧй чолӧм Прискиллалы да Акиллы. Найӧ мекӧд ӧтвыв кесъялӧны Исус Кристослы.

⁴ Найӧ вӧліны дасьӧсь олӧмнысӧ сетны ме вӧсна. Ог сӧмын ӧтнам ме аттьӧав найӧс, мукӧд войтыръясысь эскысьяслӧн вичкояс тшӧтш аттьӧалӧны.

⁵ Чолӧм тшӧтш на ордын чукӧртчысь эскысьяслы. Чолӧм менам муса Эпенетлы, Акайяын сійӧ медводдзаӧн эскис Кристослы.

⁶ Чолӧм Мариамлы, сійӧ уна уджаліс-отсасис миянлы.

⁷ Чолӧм менам войтырысь Андрониклы да Юниялы, кодъяскӧд ме пукавлі дзескыдінын. Найӧ пыдди пуктана йӧз апостолъяс пӧвстын, и найӧ меысь водз эскисны Кристослы.

⁸ Чолӧм Амплийлы, Господь пытшкын сійӧ меным муса вок.

⁹ Чолӧм Урбанлы, сійӧ миянкӧд ӧтвылысь кесъялӧ Кристослы. Чолӧм муса Стакий ёртлы.

¹⁰ Чолӧм Апелеслы. Сійӧ Кристос вӧсна уна сьӧкыд пыр муніс. Чолӧм Аристовуллӧн гортсалы.

¹¹ Чолӧм менам Иродион рӧдвужлы. Висьталӧй чолӧм Наркислӧн гортсаяс пиысь налы, кодъяс эскӧны Господьлы.

¹² Чолӧм тшӧтш мӧдӧда Енлысь уджсӧ вӧчысьяслы: Трифеналы да Трифосалы. Чолӧм муса Персида чойлы, сійӧ ёна уджаліс Господьлы.

¹³ Чолӧм Руфослы, Господьӧн бӧрйӧмалы, да сылӧн мамыслы, ӧд сійӧ меным тшӧтш мам кодь.

¹⁴ Чолӧм Асинкритлы, Флегонтлы, Ермийлы, Патровлы, Ермаслы да накӧд уджалысь вокъяслы.

¹⁵ Чолӧм Филологлы да Юлиялы, Нирейлы да сылӧн чойыслы, Олимпанлы да накӧд сэні став вежа войтырлы.

¹⁶ Чолӧмалӧй ӧта-мӧднытӧ вежа окыштӧмӧн. Тіянлы ыстӧны чолӧм Кристослӧн вичкояс.

¹⁷ Вокъяс, кора тіянӧс, видзчысьӧй да ылыстчӧй наысь, кодъяс пыртӧны вичкоад вензьӧмъяс да кежӧдӧны эскӧмсьыс, мыйӧ тіянӧс велӧдӧма.

¹⁸ Татшӧм йӧзыс кесъялӧны оз Исус Кристос Господьнымлы, но асланыс рушкулы. Мича сёрнинас найӧ кокньыда ылӧдлӧны восьса сьӧлӧмаясӧс.

¹⁹ Тіян кывзысяна олӧмныд быдӧнлы бура тӧдса. Таысь меным нимкодь. Кӧсъя, мед эськӧ ті вӧлінныд тэрыбӧсь бурыс вылӧ, но ньӧжмыдӧсь лёкыс вылӧ.

²⁰ Лӧньлунсӧ сетысь Ен регыд песовтас сӧтанасӧ тіян кокъяс улӧ. Миян Господь Исус Кристослӧн буралӧмыс тіянкӧд. Аминь.

²¹ Тіянлы ыстӧны чолӧм менам Тимофей уджъёртӧй да ас войтырысь Лукий, Ясон да Сосипатр вокъяс.

²² Чолӧмала тіянӧс Господьсянь тшӧтш ме, Тертий, тайӧ гижӧдсӧ гижысь.

²³ Чолӧм Гайсянь. Сійӧ сибӧдӧ ас ордас став эскысьсӧ, тшӧтш и менӧ. Тіянлы ыстӧны чолӧм Кварт вок да карса сьӧм видзысь Ераст.

²⁴ Миян Господь Исус Кристослӧн буралӧмыс ставныдкӧд тіянкӧд. Аминь.