Римӧ 15 - Коми Библия 2023

Эн мӧвпав куш ас йывсьыд

¹ Миянлы, вынаяслы, колӧ лоны бур сьӧлӧмаӧн вынтӧмъяс дінӧ налӧн вермытӧмлун дырйи, оз ков мӧвпавны куш ас йывсьыным.

² Быдӧнлы колӧ мӧвпавны матыссалы бур вӧчӧм йылысь, сійӧс ёнмӧдӧм могысь.

³ Ӧд Кристос эз Ас йывсьыс мӧвпав. Гижӧма: «Тэнӧ омӧльтысьяслӧн лёкӧдӧмыс уси ме вылӧ».

⁴ Став воддза гижӧдсӧ вӧлі гижӧма миянӧс велӧдӧм да бурӧдӧм могысь, медым Гижӧд пырыс ми вермим ёнмыны да зумыд лача кутны.

⁵ Бурӧдӧмсӧ да зумыдлунсӧ сетысь Ен мед сетас тіянлы ӧти сьӧлӧм. Ӧд Исус Кристос велӧдӧ,

⁶ мед ті ӧти лолӧн да ӧти вомӧн ошкинныд Енсӧ, миян Господь Исус Кристослысь Батьсӧ.

Енмыс кутӧ Ассьыс кывсӧ

⁷ Сідзкӧ, сибӧдӧй ӧта-мӧднытӧ Кристос сибыдлунӧн, медым лоӧ ошкӧма Енмӧс.

⁸ Ме тадзи гӧгӧрвоа: Исус Кристос локтіс кесъявны иудейяслы, медым збыльмӧдны батьяслы кӧсйысьӧмсӧ да петкӧдлыны, мый Енмыс кутӧ Ассьыс кывсӧ.

⁹ Кристос локтіс кесъявны тшӧтш мукӧд войтыръяслы, мед и найӧ вермисны ошкыны Енсӧ на дінӧ буралӧмысь. Та йылысь гижӧма: – Та вӧсна ме кута нимӧдны Тэнӧ мукӧд войтыръяс пӧвстын, кута сьылӧмӧн ошкыны Тэнсьыд нимтӧ.

¹⁰ Нӧшта гижӧма: – Нимкодясьӧй, мукӧд войтыръяс, Сылӧн войтыркӧд!

¹¹ И нӧшта на: – Ошкӧй Господьӧс, войтыръяс, ыдждӧдлӧй Сійӧс, став мувывса йӧз!

¹² Исай висьталӧ: – Ессей вужсянь петас вож. Сійӧ кутас веськӧдлыны войтыръясӧн, найӧ Сы вылӧ лача кутны пондасны.

¹³ Лачасӧ сетысь Ен мед тыртас тіянӧс нимкодьлунӧн да лӧньлунӧн эскӧманыд, медым Вежа Лов вынӧн ті зумыда сулалінныд лача кутӧмас.

Павеллӧн кесъялӧм

¹⁴ Вокъяс, ме тӧда, тіян бурлуныс да тӧдӧмлуныс тырвыйӧ, ті верманныд туйдӧдны ӧта-мӧднытӧ.

¹⁵ Но казьтыштӧм могысь ме мыйсюрӧ гижи тіянлы повтӧг. Тадзи вӧчи, ӧд Енмыс Аслас буралӧмнас корис менӧ

¹⁶ кесъявны Исус Кристослы ентӧдтӧмъяс пӧвстын. Менӧ сувтӧдӧма вӧчны вежа удж: висьтавны Енлысь Бур Юӧрсӧ да вайны ентӧдтӧмъясӧс Ен водзӧ шогмана да Вежа Лолӧн вежӧдӧм вись пыдди.

¹⁷ Исус Кристос пытшкын ме верма ошйысьны Енлы кесъялӧмӧн.

^18-19 Лысьта висьтавны сӧмын сы йылысь, мый Кристос вӧчис ме пыр, медым вайӧдны ентӧдтӧмъясӧс Енлысь кывзысьӧмас. Сійӧ вӧчис тайӧс Енмыслӧн Лов вынӧн менам сёрниӧй да уджӧй пыр, индысьпасъяс да шензьӧданаторъяс пыр. Ерусалимсянь да водзӧ ме паськӧді Кристос йылысь Бур Юӧрсӧ, весиг Иллирикӧдз вои.

²⁰ Мед эз ло вӧчӧма мукӧдлӧн подув вылын, ме зіли висьтавны Бур Юӧрсӧ сэні, кӧні Кристос нимсӧ эз на кывлыны.

²¹ Та йылысь гижӧма: – Кодъяслы эз висьтавлыны Сы йылысь, найӧ аддзасны, кодъяс эз на кывлыны, найӧ тӧдмаласны.

²² Тайӧ уджыс унаысь кутіс менӧ тіян дінӧ волӧмысь.

²³ Ӧні менам помалӧма тані уджсӧ. Гашкӧ, уна вося кӧсйӧмӧй волыны тіян дінӧ сэсся збыльмас.

²⁴ Испанияӧ мунігӧн пырала тіян дінӧ. Кӧсъя аддзысьлыны тіянкӧд, медым вермим ӧтлаын нимкодясьыштны. Лача кута, мый сэсся отсаланныд меным водзӧ туйӧ петны.

²⁵ Ӧні ме мӧдӧдча Ерусалимӧ кесъявны вежа войтырлы.

²⁶ Македонияса да акайяса эскысьяс шуисны сетны кутшӧмсюрӧ отсӧг ерусалимса гӧль эскысьяслы.

²⁷ Тадзи шуисны вӧчны, ӧд найӧ уджйӧзаӧсь иудейяслы. Иудейяс пыр ентӧдтӧмъяслы вичмис енэжвывса бурсиӧмыс, та вӧсна налы колӧ отсавны иудейяслы быдлунъя олӧмын.

²⁸ Тайӧ отсӧгсӧ нуӧм бӧрын вӧлисти муна Испанияӧ. Сэтчӧ мунігмоз кежала тіян дінӧ.

²⁹ Ме тӧда, мый локта тіян дінӧ Кристослӧн тыр бурсиӧмӧн.

³⁰ Вокъяс, миян Господь Исус Кристос нимӧн да Вежа Ловсянь муслунӧн кора тіянӧс: ӧтвывтчӧй менам тышъясӧ да кевмысьӧй ме вӧсна Енмыслы,

³¹ медым эг веськав Иудеяын эскытӧмъяс киӧ, да вайӧм отсӧгыс мед шогмас ерусалимса вежа войтырлы.

³² Енлы кӧ лоӧ шогмана, нимкодьпырысь локта тіян дінӧ да шойччышта тіян ордын.

³³ Лӧньлунсӧ сетысь Ен ставныдкӧд тіянкӧд. Аминь.