Римӧ 14 - Коми Библия 2023

Быдӧн ас вӧснаыс кывкутас

¹ Жеб эскысьӧс сибӧдӧй, энӧ вензьӧй, сылӧн видзӧдласыс кӧ торъялӧ.

² Ӧти эскӧ, мый позьӧ сёйны быдтор, а мӧдыс, жеб эскысьыс, сёйӧ сӧмын быдмӧг.

³ Быдтор сёйысь, эн увтырт быдмӧг сёйысьӧс, и тэ, быдмӧг сёйысь, эн мыжав быдтор сёйысьӧс. Енмыс ӧд кыкнаннытӧ сибӧдӧ.

⁴ Коді тэ сэтшӧмыс, мый йӧз кесйӧгӧс мыжалан? Сулалӧ-ӧ, усьӧма-ӧ сійӧ, сылӧн Ыджыдыс тӧдӧ. Сійӧ кутас сулавны, ӧд Енмыс вына сувтӧдны сійӧс.

⁵ Кодкӧ торйӧдӧ лунъяс, а кодлыкӧ став луныс ӧткодь. Быдӧн вӧч аслад гӧгӧрвоӧмлун серти.

⁶ Лунъяс торйӧдысь – Господь понда найӧс торйӧдӧ, коді оз торйӧд – Господь понда оз торйӧд. Быдтор сёйысь – Господь понда сёйӧ да Енсӧ аттьӧалӧ, коді оз сёй быдторсӧ – Господь понда оз сёй да тшӧтш Енсӧ аттьӧалӧ.

⁷ Ӧд некод миян пиысь оз ов да оз кув ас пондаыс.

⁸ Олам кӧ ми – Господьлы олам, кулам кӧ – Господьлы кулам. Ловъяӧсь-ӧ, кулӧмаӧсь-ӧ – ми Господьлӧн.

⁹ Кристос ӧд куліс, ловзис да олӧ, медым ыджыдавны кулӧмаяс да ловъяяс вылын.

¹⁰ Мый тэ мыжалан воктӧ? Мыйла нинӧм туйӧ пуктан сійӧс? Ставным ӧд Кристослӧн ёрд водзӧ сувтам.

¹¹ Гижӧма: Ме Ачым кыв сетӧмӧн шуа, – висьталӧ Господь, – мый быд морт пидзӧсчанясяс Ме водзӧ, быд вомсянь кыптас Енлы ошкӧм.

¹² Тадзи быдӧн ас вӧснаыс кывкутас Ен водзын.

Энӧ мыжалӧй

¹³ Водзӧ огӧ кутӧй мыжавны ӧта-мӧднымӧс. Мӧдарӧ, видзӧдӧй, медым энӧ крукӧдӧй да энӧ уськӧдӧй вокнытӧ.

¹⁴ Ме бура тӧда да эска Господь Исуслы, мый, збыльвылас, нинӧм абу пеж. Сӧмын сылы лоӧ пеж, коді лыддьӧ мыйкӧ пежӧн.

¹⁵ Тэ кӧ шогӧ уськӧдан воктӧ сёян вӧсна, сідзкӧ, тэ он вӧч мусапырысь. Эн жугӧд сійӧс аслад сёянӧн, ӧд сы вӧсна куліс Кристос.

¹⁶ Энӧ лэдзӧй серамвыв лэптыны сійӧ, мый ті лыддянныд бурӧн.

¹⁷ Ӧд Енлӧн Юралӧмыс абу сёйӧм да юӧм, тайӧ – Вежа Ловсянь веськыдлун, лӧньлун да нимкодьлун.

¹⁸ Кристослы тадзи кесъялысь шогмана Енмыслы да пыдди пуктана йӧзӧн.

¹⁹ Зілямӧй овны лӧня ӧта-мӧдӧс ёнмӧдӧмӧн.

²⁰ Сёян вӧсна эн жугӧд Енлысь уджсӧ. Ставыс сӧстӧм, но мортыслы лёк, крукӧдӧ кӧ аслас сёянӧн мӧдсӧ.

²¹ Бурджык, он кӧ сёй яй, он ю вина, он вӧч нинӧм сэтшӧмсӧ, мыйӧ вокыд крукасьӧ да усьӧ.

²² Тэнад эм эскӧм? Видз сійӧс сьӧлӧмад Ен водзын. Шуда сійӧ, коді оз мыжав асьсӧ сыысь, мый бӧрйӧ.

²³ Майшасьӧмӧн сёйысь мыжмӧ, ӧд сійӧ эскытӧг вӧчӧ. А эскытӧг вӧчӧмыд эм мыж.

²⁴ Ошкӧм Сылы, коді сетӧ тіянлы зумыда кутчысьны меӧн висьталӧм Бур Юӧрӧ, Исус Кристослӧн велӧдӧмӧ. Сэні висьталӧма важысянь дзебӧм гусяторсӧ.

²⁵ Тайӧ Бур Юӧрсӧ ӧні восьтӧма пророк гижӧдъяс пыр да помтӧг олысь Енлӧн тшӧктӧмыс серти висьталӧма быд войтырлы, медым вайӧдны найӧс кывзысьӧмас да эскӧмас.

²⁶ Дзик ӧти ыджыд мывкыда Енлы ошкӧмыс Исус Кристос пыр нэмъяс чӧж! Аминь.