Римӧ 13 - Коми Библия 2023

Юралысь – Енлӧн кесйӧг

¹ Быдӧн мед кывзысьӧ аслас юралысьыслысь, ӧд юралӧмсӧ Ен лӧсьӧдӧма, и юралысьсӧ тшӧтш Ен пуктӧма.

² Юралысьлы паныд сувтысь паныд сувтӧ Енмыслӧн лӧсьӧдӧмлы. Тадзи вӧчысь кӧлалӧ ас вылас мыждӧм.

³ Юралысьясысь полӧны лёктор вӧчигӧн, а оз бурсӧ вӧчигӧн. Кӧсъян кӧ наысь повтӧг овны, вӧч веськыда, сэки лоӧ насянь ошкӧмыс.

⁴ Юралысь – Енлӧн кесйӧг, сійӧс пуктӧма тэныд бур вылӧ. Вӧчан кӧ лёксӧ, пов! Оз ӧд весьшӧрӧ сійӧ новлӧдлы шыпурт. Сійӧ – Енлӧн кесйӧг, вермӧ чорыда дойдны лёк вӧчысьӧс.

⁵ Сідзкӧ, кутам кывзысьны юралысьяслысь огӧ мыждӧмысь полӧм вӧсна, но сьӧлӧмным висьталӧм серти.

⁶ Тайӧ уджыс налӧн Енлы кесъялӧм, та вӧсна ті мынтанныд налы вотсӧ.

⁷ Сідзкӧ, сетӧй быдӧнлы коланасӧ: кодлы вот сетны – сылы вот сетӧй, кодлы мын – сылы мын, кодысь колӧ повны – сыысь полӧй, кодӧс колӧ пыдди пуктыны – сійӧс пыдди пуктӧй.

Муслуныс – Индӧдсӧ тырвыйӧ пӧртӧм

⁸ Энӧ кольӧй некодлы уджйӧзаӧн, ӧта-мӧдтӧ радейтӧм кындзи. Ӧд мӧдӧс радейтӧмнад тэ тырвыйӧ пӧртан олӧмӧ Индӧдсӧ.

⁹ Тайӧ тшӧктӧмъяссӧ «Гозъякост олӧм эн пежав», «Эн ви», «Эн гусясь», «Эн пӧръясь», «Эн ышты» да став мукӧд тшӧктӧмсӧ шымыртӧма ӧти тшӧктӧмӧ: «Радейт матыссатӧ асьтӧ моз».

¹⁰ Муслуныс оз вай лёксӧ матыссаыдлы. Муслуныс – тайӧ Индӧдсӧ тырвыйӧ олӧмӧ пӧртӧм.

Воис кад садьмыны

¹¹ Тадзи вӧчӧй, ті ӧд тӧданныд, мый воис нин кад садьмыны миянлы. Мездмӧмыс ӧні ёна нин матын сэкъя дорысь, кор ми сӧмын на пондім эскыны.

¹² Войыс кольӧ, луныс матыстчӧ. Сідзкӧ, шыбитам пемыдыслысь уджъяссӧ да пасьтасям югыдыслӧн вермасянторйӧ.

¹³ Лунъюгыдын моз пондам овны бур ногӧн. Огӧ сетчӧй гажӧдчӧмӧ да кодалӧмӧ, гозъякост олӧм пежалӧмӧ да лэдзчысьӧм оласногӧ, вензьӧмӧ да вежалӧмӧ.

¹⁴ Тіян паськӧмӧн мед лоӧ Господь Исус Кристос. Вир-яйныд вӧсна тӧждысьӧмсӧ энӧ бергӧдӧй сылысь лёк кӧсйӧмсӧ могмӧдӧмӧ.