Римӧ 12 - Коми Библия 2023

Выль олӧм

¹ Вокъяс, Енлӧн ыджыд буралӧмыс вӧсна кора тіянӧс: сетӧй асьнытӧ Енлы ловъя, вежа да шогмана вись пыдди. Тайӧ лоӧ бур мывкыда кесъялӧм Енмыслы.

² Энӧ вужъясьӧй тайӧ мувывса оласногас. Лэдзӧй Енмыслы вежны тіянӧс, выльмӧдны вежӧрнытӧ, медым тӧдны тіянлы Сылысь кӧсйӧмсӧ: мый колана, шогмана да тыр-бур.

³ Меным сетӧм буралӧм вӧсна висьтала тіянлы быдӧнлы: энӧ мӧвпалӧй ас йывсьыныд вывті, коланасьыс унджык, но мӧвпалӧй ышнясьтӧг, Енмӧн сетӧм эскӧм сертиныд.

⁴ Кыдзи ӧти вир-яйлӧн эм уна юкӧн, и быд юкӧн вӧчӧ ассьыс удж,

⁵ тадзи Кристос пытшкын ставным ми – ӧти вир-яй да ӧти вир-яйлӧн юкӧнъяс.

⁶ Миянлы сетӧм буралӧм серти миян эм унапӧлӧс сетӧмторъяс: кодлы сетӧма пророкавны, мед пророкалӧ эскӧм сертиыс,

⁷ кодлы сетӧма кесъявны, мед кесъялӧ, кодлы сетӧма велӧдны, мед велӧдӧ,

⁸ кодлы сетӧма ышӧдны, мед ышӧдӧ, кодлы сетӧма отсасьны аслас эмбурӧн, мед отсасьӧ сьӧлӧмсяньыс, кодлы сетӧма веськӧдлыны, мед веськӧдлӧ тӧждысьӧмӧн, кодлы сетӧма бурсӧ вӧчны, мед вӧчӧ нимкодьпырысь.

⁹ Радейтӧй восьса сьӧлӧмӧн, ылыстчӧй лёксьыс да кутчысьӧй бурас.

¹⁰ Радейтӧй ӧта-мӧднытӧ чой-вокӧс моз, пуктӧй ӧта-мӧднытӧ ассьыд вылӧджык.

¹¹ Тӧждысиганыд энӧ дышмӧй, ловнад ӧзъялӧй, Господьлы кесъялӧй.

¹² Лачанытӧ кутӧй нимкодьпырысь, шогъястӧ нуӧй терпитӧмӧн, дугдывтӧг кевмысьӧй.

¹³ Вежа войтырлы отсалӧй абутӧмлун дырйиныс, сибӧдӧй ветлысь-мунысьясӧс,

¹⁴ бурсиӧй тіянӧс вӧтлысьясӧс, бурсиӧй найӧс, а энӧ ёрӧй.

¹⁵ Нимкодясьысьяскӧд нимкодясьӧй, бӧрдысьяскӧд бӧрдӧй.

¹⁶ Ас костаныд лоӧй ӧти сьӧлӧмаӧсь, энӧ лыддьӧй асьнытӧ бурджыкӧн, коньӧръясӧс энӧ ӧтдортӧй да сюсьӧ энӧ пуксьӧй.

¹⁷ Лёк вӧчӧмысь лёкӧн энӧ мынтысьӧй, йӧзыс водзын ставсӧ зільӧй вӧчны веськыда.

¹⁸ Верманныд кӧ, олӧй лӧня ставныскӧд.

¹⁹ Мусаяс, энӧ перйӧй водзӧс ас вӧснаныд, сетӧй тайӧс вӧчны Енлӧн скӧрлунлы. Ӧд гижӧма: «Ме водзӧс перъя, Ме мынтыся, – висьталӧ Господь. –

²⁰ Тэнӧ мустӧмтысь кӧ тшыг, верд сійӧс, горшыс кӧ косьмӧ, юктав сійӧс. Тадзи тэ чукӧртан сылы юр вылас биа ӧгыръяс».

²¹ Эн сет лёкыслы вермыны тэнӧ, но вермы лёксӧ бурнас.