Псалтыр 97 - Коми Библия 2023

97 Псалом

1 [Давидлӧн] псалом.

¹ [Давидлӧн] псалом. Сьылӧй Господьлы выль сьыланкыв! Сійӧ вӧчис шензьӧданаторъяс. Сылӧн веськыд киыс да вежа выныс вайисны Сылы вермӧмсӧ.

² Господь петкӧдліс Ассьыс мездӧмсӧ, восьтіс войтыръяслы Ассьыс веськыдлунсӧ.

³ Сійӧ эз вунӧд [Яковсянь чужысьяс дінӧ] Ассьыс буралӧмсӧ, петкӧдліс Израиль войтырлы Ассьыс эсканлунсӧ. Став му пасьтала олысьяс аддзисны, мый миян Енным мездіс миянӧс.

⁴ Му вылын олысьяс, гораа ошкӧй Господьӧс, сьылӧй-гажӧдчӧй да нимкодясьӧй!

⁵ Сьылӧй Господьлы да ворсӧй гуслиӧн, ворсӧй гуслиӧн да сьылӧй.

⁶ Труба да буксан шы улӧ ошкӧй Господьӧс, миянлысь Ӧксыӧс.

⁷ Мед шызяс саридзыс да ставыс, мый сэні эм, мед шызяс муыс да став сэні олысьыс.

⁸ Мед сёльӧдчасны юяс, накӧд ӧтвыв мед нимкодясясны керӧсъяс

⁹ Господь водзын, ӧд Сійӧ локтӧ мыждыны мусӧ. Сійӧ кутас веськыда мыждыны муюгыдсӧ, кутас мыждыны войтыръясӧс Аслас веськыдлуныс серти.