Псалтыр 96 - Коми Библия 2023

96 Псалом

[Давид лӧсьӧдіс тайӧ псаломсӧ, кор Израиль му лои сылӧн юраланінӧн.]

¹ Господь ӧксыалӧ! Мед нимкодясяс муыс, мед гажӧдчасны лыдтӧм-тшӧттӧм діяс!

² Господьӧс кытшалӧны сьӧд кымӧр да пемыд, Сылӧн юралӧмлӧн подулыс – веськыдлун да веськыда мыждӧм.

³ Господь водзвылын мунӧ би, Господьӧс мустӧмтысьясӧс бырӧдӧ.

⁴ Сылӧн чардбиыс югзьӧдлӧ муюгыдсӧ, муыс аддзӧ тайӧс да сыркмунлӧ.

⁵ Господьлӧн чужӧмбан водзын сись моз сылӧны керӧсъяс, ӧд Сійӧ став му пасьтала Ыджыдыс.

⁶ Енэжъясыс юӧртӧны Сылысь веськыдлунсӧ, войтыръяс аддзӧны Сылысь дзирдлунсӧ.

⁷ Мед яналасны бӧлбанъяслы юрбитысьяс, идолъясӧн ошйысьысьяс. Копыртчӧй Господь водзӧ, став енъяс.

⁸ Сион кылӧ тайӧс да кыпыда гажӧдчӧ, Иуда каръяс нимкодясьӧны Тэнад веськыда мыждӧмыд йылысь, Господьӧй.

⁹ Тэ – Медвылыссаыс став му пасьталаыс, Господьӧй, став енсьыс Тэ медвылын.

¹⁰ Господьӧс радейтысьяс, мустӧмтӧй лёксӧ! Сійӧ видзӧ Аслас эскана войтырлысь олӧмсӧ, мездӧ найӧс лёк вӧчысьяслӧн киысь.

¹¹ Веськыда олысьяслы лоӧ югыд, веськыд сьӧлӧмаяслы – нимкодь.

¹² Нимкодясьӧй Господьӧн, веськыда олысьяс, ошкӧй Сылысь вежа нимсӧ! Ошкӧм.