Псалтыр 94 - Коми Библия 2023

94 Псалом

[Давидлӧн ошкана сьыланкыв.]

¹ Локтӧй, сьыламӧй Господьлы, кыпыда сьылӧмӧн ошкамӧй Сійӧс, Сійӧ – миян мездмӧмлӧн зумыд подулыс.

² Локтӧй Сылӧн чужӧмбан водзӧ Сійӧс аттьӧалӧмӧн, ошкӧй Сійӧс гораа сьылӧмӧн!

³ Господь – ыджыд Ен, Сійӧ – став енъяс вылын ыджыд Ӧксы.

⁴ Му пыдӧсыс – Сы киын, керӧс йылыс – Сылӧн,

⁵ саридзыс тшӧтш Сылӧн, Аслас киӧн Сійӧ вӧчис саридзсӧ да мусӧ.

⁶ Локтӧй да копыртчамӧй Господь водзӧ, сувтамӧй пидзӧс выланым миянӧс Вӧчысь водзӧ.

⁷ Ӧд Сійӧ – миян Ен, а ми – Сылӧн йӧрысь ыжъясыс, Сійӧ видзӧ миянӧс. Ті кӧ талун кыланныд Сылысь гӧлӧс шысӧ,

⁸ энӧ чорзьӧдӧй сьӧлӧмнытӧ, кыдзи ті вӧчинныд овтӧминын, Мерива да Масса дорын.

⁹ Сэні тіян батьясныд аддзылісны Менсьым уджъясӧс, но дӧзмӧдісны Менӧ.

¹⁰ Нелямын во чӧж Ме дӧзмывлі на вылӧ. Ме шуи: – Тайӧ войтырыс сьӧлӧмнас ылалӧма, Менсьым туйясӧс найӧ оз тӧдны.

¹¹ Та вӧсна Ме скӧрми на вылӧ да кыв сеті, мый найӧ оз пырны Менам шойччанінӧ.