Псалтыр 93 - Коми Библия 2023

93 Псалом

[Давидлӧн псалом. Сьылӧны вежонса нёльӧд лунӧ.]

¹ Господьӧй, Тэ – водзӧс перйысь Ен. Водзӧс перйысь Енмӧй, петкӧдчы дзирдлуннад!

² Кыпӧдчы, муюгыдсӧ Мыждысьӧй, мынтысь вылӧ кыпӧдчысьяслы налӧн уджъясыс серти.

³ Господьӧй, дыр-ӧ на лёк вӧчысьяс пондасны гажӧдчыны?

⁴ Найӧ ышнясьӧны, налӧн вомысь петӧны тшап кывъяс.

⁵ Господьӧй, Тэнсьыд войтыртӧ найӧ топӧдӧны, Тэнсьыд бӧрйӧм войтыртӧ дзескӧдӧны.

⁶ Дӧваясӧс да йӧз муысь локтысьясӧс найӧ бырӧдӧны, батьтӧм-мамтӧмъясӧс виалӧны.

⁷ Найӧ шуалӧны: «Господь оз аддзы, Яковлӧн Енмыс оз тӧдмав».

⁸ Вежӧрсялӧй, мывкыдтӧмъяс! Вежӧртӧмъяс, кор ті мывкыдсяланныд?

⁹ Пель Вӧчысь ӧмӧй оз кыв, син Вӧчысь ӧмӧй оз аддзы?

¹⁰ Войтыръяслы вежӧр Сетысьыс, мортсӧ гӧгӧрвоны Велӧдысьыс оз ӧмӧй мыжды?

¹¹ Господь тӧдӧ мортлысь мӧвпъяссӧ, Сійӧ тӧдӧ, мый найӧ ковтӧмӧсь.

¹² Шуда сійӧ мортыс, кодӧс Тэ, Господьӧй, вежӧрсьӧдан да велӧдан Аслад Индӧдӧ.

¹³ Тэ сетан сылы лӧньлун сьӧкыд кадӧ, кытчӧдз лёк вӧчысьлы оз ло кодйӧма гу.

¹⁴ Ӧд Господь оз ӧтдорт Ассьыс войтырсӧ, оз эновт Ассьыс бӧрйӧм войтырсӧ.

¹⁵ Йӧз пӧвстын бара лоӧ веськыда мыждӧм, и веськыд сьӧлӧмаяс кутчысясны сэтчӧ.

¹⁶ Коді доръяс менӧ лёк вӧчысьясысь? Коді ме дор сувтас мыж вӧчысьяслы паныд?

¹⁷ Господь кӧ эз отсав меным, менам лолӧй эськӧ важӧн нин вуджис мӧдаръюгыдас.

¹⁸ Кор ме шулывлі, мый менам кокӧй лигышмуніс, Тэнад буралӧмыд, Господьӧй, кутыштліс менӧ.

¹⁹ Кор менам сьӧлӧмӧй тырӧма шогнас, Тэнад бурӧдӧмыд гажӧдӧ менсьым лолӧс.

²⁰ Тэ ӧмӧй ӧтувтчан накӧд, кодъяс оз веськыда мыждыны? Найӧ быттьӧ кутчысьӧны Индӧдас, но вӧчӧны лёксӧ.

²¹ Найӧ чукӧрӧн уськӧдчӧны веськыда олысь вылӧ, мыжтӧм мортӧс кулӧм вылӧ мыждӧны.

²² Но Господь – менӧ Дорйысьыс, менам Енмӧй – менам изкыртаӧй да сайӧдчанінӧй.

²³ Налысь лёк вӧчӧмсӧ Господь бергӧдас ас выланыс, Сійӧ бырӧдас найӧс лёк пытшканыс. Господь, миян Енным, бырӧдас найӧс. Ошкӧм.