Псалтыр 91 - Коми Библия 2023

91 Псалом

¹ Псалом. Сьылӧны шойччан лунӧ.

² Кутшӧм бур ошкыны Тэнӧ, Господьӧй, сьылӧмӧн ошкыны Тэнсьыд нимтӧ, Медвылыссаӧй!

³ Кутшӧм бур асывнас юӧртны Тэнсьыд буралӧмтӧ, рытнас – Тэнсьыд збыльтӧ,

⁴ ошкыны Тэнӧ арфаӧн да гуслиӧн, дас струнаа ворсанторйӧн.

⁵ Господьӧй, Тэ гажӧдан менӧ Аслад уджъяснад. Ме нимкодяся Тэнад киӧн вӧчӧмторъясысь.

⁶ Господьӧй, кутшӧм ыджыдӧсь Тэнад уджъясыд, кутшӧм мывкыдаӧсь Тэнад мӧвпъясыд!

⁷ Вежӧртӧм морт оз тӧд, мывкыдтӧм морт оз гӧгӧрво тайӧс.

⁸ Ентӧг олысьяс вежӧдӧны турун моз, лёк вӧчысьяс дзоридзалӧны, но найӧ бырасны пыр кежлӧ.

⁹ Но Тэ, Господьӧй, нэмъяс чӧж Медвылыссаыс.

¹⁰ Господьӧй, Тэнӧ мустӧмтысьяс кулӧны, лёксӧ вӧчысьяс разалӧны.

¹¹ Тэ ёнмӧдан менӧ, и ме лоа ӧш кодь вына, Тэ мавтыштан менӧ выль выйӧн.

¹² Аслам синмӧн ме аддза паныд сувтысьяслысь усьӧмсӧ, аслам пельӧн ме кыла лёк вӧчысьясӧс бырӧдӧмсӧ.

¹³ Веськыда олысьяс дзоридзалӧны пальма моз, кыпӧдчӧны ливанса сус пу моз.

¹⁴ Найӧс вужйӧдӧма Господьлӧн керкаын, найӧ дзоридзалӧны миян Енлӧн йӧръясын.

¹⁵ Весиг пӧрысь кадӧ веськыда олысьяс вайӧны вотӧс, лоӧны чӧскыдӧсь да вежӧсь,

¹⁶ юӧртӧны Господьлӧн веськыда вӧчӧмыс йылысь. Сійӧ – менам изкыртаыс, Сы пытшкын ылӧгыс абу.