Псалтыр 90 - Коми Библия 2023

90 Псалом

[Давидлӧн ошкана сьыланкыв.]

¹ Медвылыссалӧн вевттьӧд улын олысь, Ставсӧвермысьлӧн бордъяс улын шойччысь

² шуӧ Господьлы: «Тэ – менам сайӧдчаніныс да изкарыс, Тэ – менам Ен, Тэ вылӧ ме лача кута».

³ Господь видзӧ тэнӧ налькйӧ шедӧмысь, мездӧ тэнӧ пӧрӧс висьӧмысь.

⁴ Сійӧ вевттьӧ тэнӧ бордъяснас, Сылӧн борд улын тэныд нинӧмысь повнысӧ. Сылӧн збыльыс – тэныд сайӧд да зумыд потшӧс.

⁵ Луннас он повзьы ньӧвйӧн лыйӧмысь, и войыс тэнӧ оз повзьӧд.

⁶ Он повзьы пемыдас ветлысь пӧрӧс висьӧмысь и луншӧр кадӧ бырӧдысь висьӧмысь.

⁷ Мед кӧть сюрсъяс усясны тэ гӧгӧр, дас сюрсъяс куласны тэнад веськыдладорысь, но тэныд тайӧ оз инмы.

⁸ Тэ сӧмын кутан видзӧдны, аслад синнад аддзан лёк вӧчысьяслысь водзӧс перйӧмсӧ.

⁹ Ӧд Господь – тэнад лачаыд, Медвылыссаӧс тэ бӧрйин аслыд сайӧдчанінӧн.

¹⁰ Оз су тэнӧ лёкыс, пеж висьӧм оз инмӧдчы тэнад оланінӧ.

¹¹ Аслас анделъяслы Господь тшӧктӧ видзны тэнӧ став тэнад туйяс вылын.

¹² Найӧ нуасны тэнӧ ки выланыс, видзасны изйӧ крукасьӧмысь.

¹³ Яда змей вылӧ тувччан, талялан левӧс да гундырӧс.

¹⁴ Господь висьталӧ: «Сійӧ радейтӧ Менӧ, та вӧсна Ме мезда сійӧс. Ме доръя сійӧс, ӧд сійӧ тӧдӧ Менсьым нимӧс.

¹⁵ Сійӧ шыасяс Ме дінӧ, и Ме вочавидза сылы. Ме лоа сыкӧд сьӧкыд нуигас, мезда сійӧс да нимӧда сійӧс.

¹⁶ Ме нюжӧда сылысь олан лунъяссӧ, петкӧдла сылы Ассьым мездӧмӧс». Ошкӧм.