Псалтыр 9 - Коми Библия 2023

9 Псалом

¹ Сьылысьясӧн веськӧдлысьлы. Сьылісны Лабенлӧн кулӧм бӧрын. Давидлӧн псалом.

² Господьӧй, кута ошкыны Тэнӧ став сьӧлӧмсянь, понда висьтавлыны Тэнад шензьӧдана уджъясыд йылысь.

³ Кута кыпыда гажӧдчыны да нимкодясьны Тэӧн, понда сьылӧмӧн ошкыны Тэнсьыд нимтӧ, Медвылыссаӧй.

⁴ Меным паныд сувтысьяс бӧр бергӧдчасны да пышъясны, усясны да бырасны Тэнад чужӧмбан водзысь.

⁵ Медым веськыда мыждыны, Тэ пуксин юралан пуклӧсӧ, Тэ веськыда мыждін менӧ, петкӧдлін менсьым мыжтӧмлунӧс.

⁶ Тэ дӧзмин войтыръяс вылӧ, бырӧдін лёк вӧчысьясӧс, вуштыштін налысь нимсӧ пыр кежлӧ.

⁷ Вӧрӧгыс абу, сійӧс пасьвартӧма, мустӧмтысьяслысь каръяссӧ Тэ кисьтін, на йылысь оз нин казьтывлыны.

⁸ Но Господь олӧ нэмъяс чӧж, Сійӧ дасьтіс Ассьыс юралан пуклӧссӧ, медым мыждыны.

⁹ Сійӧ кутас веськыда мыждыны муюгыдсӧ, Сійӧ веськыда мыждас войтыръясӧс.

¹⁰ Господь лоӧ сайӧдчанінӧн дзескӧдӧмалы, дзебсянінӧн – шог дырйи.

¹¹ Тэнсьыд нимтӧ тӧдысьяс пондасны Тэ вылӧ лача кутны, ӧд Тэ, Господьӧй, он эновт Тэнӧ корсьысьясӧс.

¹² Сьылӧй Господьлы, Сионын Олысьлы, войтыръяс пӧвстын висьтавлӧй Сылӧн уджъясыс йылысь!

¹³ Сійӧ оз вунӧд виӧмаясӧс, водзӧс перъяс вир кисьтӧмысь, оз вунӧд дзескӧдӧмаяслысь бӧрдӧмсӧ.

¹⁴ Господьӧй, ло бур сьӧлӧма ме дінӧ, видзӧдлы, кутшӧма ме сьӧкыдала менӧ мустӧмтысьяс вӧсна. Тэ лэптан менӧ кулӧмыслӧн дзиръя дорысь.

¹⁵ Сэки ме кута висьтавлыны Тэнад ошкана уджъясыд йылысь, сионса дзиръяяс дорын кута нимкодясьны, мый Тэ мездін менӧ.

¹⁶ Войтыръяс усисны гуӧ, кодӧс асьныс кодйисны. Налӧн кокныс шедіс налькйӧ, кодӧс асьныс пуктісны.

¹⁷ Господьӧс тӧдмалӧны Сылӧн веськыда мыждӧмыс серти – лёк вӧчысь шедӧ аслас киӧн вӧчӧм налькйӧ.

¹⁸ Мед веськаласны пыдӧстӧминӧ лёк вӧчысьяс, Енсӧ вунӧдысь войтыръяс.

¹⁹ Корысьӧс оз ло пыр кежлӧ вунӧдӧма, гӧль мортлӧн лачаыс оз дзикӧдз вош.

²⁰ Кыпӧдчы, Господьӧй! Эн лэдз мортыслы пуктыны асьсӧ Тэысь вылӧджык, войтыръясӧс мед лоӧ мыждӧма Тэнад син водзын!

²¹ Господьӧй, чорыда повзьӧд войтыръясӧс, мед тӧдасны, мый найӧ сӧмын мортъяс.

²² Господьӧй, мыйла Тэ ылын сулалан, мыйла тупкан чужӧмбантӧ, кор ми сьӧкыдалам?

²³ Вылӧ кыпӧдчӧмнас лёк вӧчысь дзескӧдӧ гӧльӧс, но сійӧ ачыс мед шедас аслас наян мӧвпъясас.

²⁴ Лёк вӧчысь ошйысьӧ ассьыс кӧсйӧмсӧ збыльмӧдӧмнас, горшасьысь бурмӧдӧ сьӧлӧмсӧ озырлуннас.

²⁵ Вылӧ пуксьӧмнас лёк вӧчысь нинӧмӧ пуктӧ Господьӧс, мӧвпалӧ, мый Енмыс оз мыжды, мый Енмыс абу.

²⁶ Сылӧн олан туйясыс вайӧдӧны кулӧмӧ, сійӧ чайтӧ, мый Тэнад мыждӧмыд ылын сыысь. Сійӧ сералӧ сылы паныд сувтысьяс вылын,

²⁷ мӧвпалӧ: «Ме ог усь, менӧ некор оз су лёкыс».

²⁸ Сылӧн вомыс тырӧма ёрӧмӧн, ылӧгӧн да пӧръясьӧмӧн, сылӧн кывйыс вайӧ шог да кулӧм.

²⁹ Сійӧ дзебсясьӧ йӧр ортсыын, кытысь некод оз аддзы сійӧс. Сэні сійӧ виӧ мыжтӧмӧс, сылӧн синмыс кыйӧдӧ коньӧрӧс.

³⁰ Сійӧ кыйӧдчӧ лев моз, дзебсьӧмӧн виччысьӧ кыйӧдчанінас, тшапнитӧ коньӧрӧс да кыскӧ сійӧс аслас налькйӧ.

³¹ Сійӧ лажыньтчылӧмӧн уськӧдчӧ, и коньӧръяс веськалӧны сылӧн ёсь гыж улӧ.

³² Лёк вӧчысь мӧвпалӧ: «Енмыс вунӧдіс, тупкис Ассьыс чужӧмбансӧ да оз аддзы».

³³ Кыпӧдчы, Господьӧй Енмӧй! Лэпты Ассьыд китӧ! Дзескӧдӧмаясӧс [дзикӧдз] эн вунӧд!

³⁴ Мыйла лёк вӧчысь нинӧм туйӧ пуктӧ Енсӧ, мӧвпалӧ, мый Сійӧ оз мыжды?

³⁵ Но Тэ, Господьӧй, ставсӧ аддзан, Тэ аддзан увтыртӧм да дзескӧдӧм, Тэ лэптан Ассьыд китӧ. Гӧль морт локтӧ Тэ дінӧ, батьтӧм-мамтӧмлы Тэ сетан отсӧг.

³⁶ Чегъяв Ентӧг олысьяслысь да лёк вӧчысьяслысь кисӧ, мыжды найӧс да пукты пом налӧн лёк уджъяслы!

³⁷ Господьӧй, Тэ – Ӧксыыс пыр кежлӧ да нэмъяс чӧж. Мукӧд войтыръяс бырасны Тэнад муысь.

³⁸ Господьӧй, Тэ кылан рам сьӧлӧмаяслысь корӧм-кевмӧмсӧ, ёнмӧдан налысь сьӧлӧмсӧ. Восьт Ассьыд пельтӧ,

³⁹ дорйы батьтӧм-мамтӧмӧс да увтыртӧмаӧс, бырӧд дзескӧдысьясӧс му вылысь.