Псалтыр 88 - Коми Библия 2023

88 Псалом

¹ Эзрахса Этанлӧн сьыланкыв.

² Господьӧй, Тэнад буралӧмыд йылысь кута сьывны помтӧг, Тэнсьыд збыльтӧ кута юӧртны чужысьяссянь чужысьясӧдз.

³ Тэнад буралӧмыд лоӧ нэмъяс чӧж, енэжас Тэ вынсьӧдін Ассьыд збыльтӧ.

⁴ Ме, Господь, кӧрталі йитӧд Аслам бӧрйӧмакӧд, кыв сеті Аслам Давид кесйӧглы.

⁵ Шуи: Ме ёнмӧда тэнсьыд рӧдтӧ пыр кежлӧ, тэнад юралан пуклӧсыд сулалас чужысьяссянь чужысьясӧдз.

⁶ Господьӧй, енэжъясыс ошкӧны Тэнсьыд шензьӧданаторъястӧ, вежаяслӧн чукӧртчӧмын нимӧдӧны Тэнсьыд збыльтӧ.

⁷ Енэжас Господь кодьыс абу, енъясӧс оз позь ӧткодявны Господькӧд.

⁸ Ен водзын тіралӧны енэжвывса вежаяс, Сыысь полӧ Сы гӧгӧр став олысьыс.

⁹ Господьӧй, Ен Саваоф, Тэ кодь вынаыс абу, Тэ быдторйын эскана Ен.

¹⁰ Тэ ыджыдалан шызьӧм саридз вылын, Тэ лӧньӧдан сылысь гыяссӧ.

¹¹ Тэ кувтӧдз пасьвартін Рахавӧс, саридзын олысь зверӧс, вына кинад вӧтлін вӧрӧгтӧ.

¹² Енэжыс Тэнад, и муыс Тэнад, Тэ вӧчин муюгыдсӧ да ставсӧ, мый сэні эм.

¹³ Тэ вӧчин войвыв да лунвыв, Тавор да Ермон керӧсъяс нимкодясьӧны Тэнад нимыд йылысь.

¹⁴ Тэнад киыд вына, Тэнад сойыд ён, веськыд китӧ Тэ кыпӧдӧмыд вылӧ.

¹⁵ Тэнад юралӧмыдлӧн подулыс – веськыдлун да веськыда мыждӧм. Буралӧмыс да збыльыс ветлӧны Тэ водзвылын.

¹⁶ Шуда сійӧ войтырыс, коді нимкодясьӧмӧн ошкӧ Тэнӧ, Господьӧй. Найӧ олӧны Тэнад чужӧмбанлӧн югыдас.

¹⁷ Быд лун найӧ нимкодясьӧны Тэнад нимыд йылысь, Тэнад веськыдлуныд найӧс вылӧ кыпӧдӧ.

¹⁸ Тэ – миян выныс да ошйысянторйыс, Тэнад бурлуныд кыпӧдӧ юрнымӧс.

¹⁹ Господьсянь миян дорйысьыс, Израильлӧн вежа Енсянь миян ӧксыыс.

²⁰ Петкӧдчылӧм пыр Тэ висьтавлін Аслад эскана кесйӧгъяслы: «Ме отсалі повтӧмлы, сувтӧді войтыр пӧвстысь Аслым бӧрйӧмаӧс.

²¹ Ме аддзи Аслым кесйӧгӧс – Давидӧс, Аслам вежа выйӧн мавтышті сійӧс.

²² Менам киӧй отсалӧ сылы, Менам вынӧй ёнмӧдӧ сійӧс.

²³ Вӧрӧг оз вермы сійӧс, лёк вӧчысь оз дзескӧд сійӧс.

²⁴ Паныд сувтысьясӧс Ме пасьварта сылӧн син водзын, сійӧс мустӧмтысьясӧс Ме бырӧда.

²⁵ Менам збыльӧй да буралӧмӧй сыкӧд, Менам нимӧй вылӧ кыпӧдӧ сійӧс.

²⁶ Ме сета сылӧн кипод улӧ став мусӧ саридз дорсянь ыджыд юясӧдз.

²⁷ Сійӧ шуӧ Меным: ”Тэ менам Бать, менам Ен, менам мездмӧмлӧн зумыд подулыс”.

²⁸ Сійӧс Ме шуи медводдза чужысьӧн, сійӧс Ме кыпӧда мувывса став ӧксыясысь на вылӧджык.

²⁹ Менам буралӧмӧй сы дінӧ оз помасьлы, сыкӧд кӧрталӧм йитӧдӧй зумыд.

³⁰ Ме ёнмӧда сылысь рӧдсӧ пыр кежлӧ, сылӧн юралан пуклӧсыс енэжыс моз пыр сулалас.

³¹ Сылӧн пияныс кӧ эновтасны Менсьым Индӧдӧс, оз кутны овны Менам тшӧктӧмъяс серти,

³² найӧ кӧ торкасны Менсьым Индӧдӧс, оз видзны Менсьым кывъясӧс,

³³ сэки Ме беддьӧн нӧйта найӧс мыжъяссьыныс, ньӧръяла найӧс лёк вӧчӧмсьыныс.

³⁴ Но Ассьым буралӧмӧс ог вешты на дінысь, ог веж Ассьым веськыдлунӧс.

³⁵ Ог торк Ассьым йитӧдӧс, мый кӧрталі накӧд, ог веж Аслам вомысь петӧм кывъясӧс.

³⁶ Ӧтчыд и пыр кежлӧ Ме кыв сеті, кӧсйыси Аслам вежалунӧн, мый ог пӧръяв Давидӧс.

³⁷ Сылӧн рӧдыс лоӧ нэмъяс чӧж, сылӧн юралан пуклӧсыс шонді моз пыр сулалас Ме водзын,

³⁸ сылысь юралан пуклӧссӧ лоӧ зумыдмӧдӧма нэмъяс кежлӧ, кыдзи енэжас зумыда ӧшалӧ ставсӧ аддзысь тӧлысь».

³⁹ Но Тэ дӧзмин Аслад мавтыштӧмаыд вылӧ, ӧтдортін-эновтін сійӧс.

⁴⁰ Тэ орӧдін йитӧдтӧ, мый кӧрталін Аслад кесйӧгкӧд, ӧксылысь юркытшсӧ шыбитін муас.

⁴¹ Сылӧн карлысь стенъяссӧ Тэ жугӧдін, сылӧн изкаръясысь вӧчин из чукӧръяс.

⁴² Ветлысь-мунысьяс гусялӧны сылысь эмбурсӧ, орччӧн олысьяслы сійӧ лои серамтуйын.

⁴³ Сійӧс дзескӧдысьясӧс Тэ ёнмӧдін, сійӧс мустӧмтысьяслы сетін нимкодясьны,

⁴⁴ сылысь шыпуртсӧ Тэ бергӧдін аслыс паныд, эн отсав сылы тышын.

⁴⁵ Тэ пуктін пом сылӧн ыджыдалӧмлы, сылысь юралан пуклӧссӧ пӧрӧдін.

⁴⁶ Тэ дженьдӧдін сылысь томдырся лунъяссӧ, вевттин сійӧс янӧдӧмӧн.

⁴⁷ Господьӧй, Тэ ӧмӧй пыр кежлӧ дзебсин? Тэнад скӧрлуныд ӧмӧй помтӧг кутас ыпъявны би моз?

⁴⁸ Эн вунӧд, мый мортлӧн олан лунъясыс дженьыдӧсь. Тэ вӧчин мортӧс, и сійӧ ӧмӧй нинӧм абу кодь?

⁴⁹ Эм-ӧ сэтшӧм морт, кодӧс эськӧ эз су кулӧмыс, коді эськӧ видзис ассьыс олӧмсӧ пыдӧстӧминӧ вуджӧмысь?

⁵⁰ Господьӧй, кӧні Тэнад важ моз буралӧмыд? Кӧні Тэнад Давидлы сетӧм кывйыд?

⁵¹ Господьӧй, эн вунӧд, мыйта лёкӧдӧны Тэнсьыд кесйӧгъястӧ войтыръяс, мыйта дой ме нуа сьӧлӧмын.

⁵² Господьӧй, эн вунӧд Ассьыд мавтыштӧматӧ, Тэнӧ мустӧмтысьяс омӧльтӧны сійӧс, лёкӧдӧны сылысь быд воськов.

⁵³ Ошкӧм Господьлы нэмъяс чӧж! Аминь, аминь. Ошкӧм.