Псалтыр 87 - Коми Библия 2023

87 Псалом

¹ Сьыланкыв. Корей пиянлӧн псалом. Сьылысьясӧн веськӧдлысьлы. Сьылӧны ”Махалат” шылад улӧ. Эзрахса Еманлӧн сьыланкыв.

² Господьӧй Енмӧй, менӧ Мездысьӧй, лун и вой ме шыася Тэ дінӧ.

³ Менам кевмысьӧмӧй мед воас Тэнад чужӧмбан водзӧ, копырт Ассьыд пельтӧ менам кевмӧмлань.

⁴ Менам олӧмӧй тырӧма шогӧн, ме матыстча кулӧмаяслӧн оланінлань.

⁵ Менӧ дасьтӧны гуавны, ме лои вынсӧ воштӧм морт кодь,

⁶ менӧ кольӧма кулӧмаяс пӧвстӧ, гуын куйлысь виӧмаяс дінӧ. Найӧс Тэ он нин казьтыв, Тэнад киыд найӧс оз нин видз.

⁷ Тэ шыбитін менӧ пыдӧстӧм гуӧ, пемыдінӧ да джуджыдінӧ.

⁸ Тэнад скӧрлуныд дзикӧдз личкис менӧ, Тэнад гыясыд уськӧдісны менӧ кок йылысь.

⁹ Тэ ылыстін ме дінысь тӧдсаясӧс, вӧчин менӧ налы зывӧкторйӧн. Менӧ йӧртӧма дзескыдінӧ, ог вермы сэтысь петнысӧ.

¹⁰ Бӧрдӧмӧйла менам синмӧй пемдіс. Господьӧй, быд лун ме шыася Тэ дінӧ, лэпта киӧс Тэлань.

¹¹ Тэ ӧмӧй кулӧмаяслы вӧчан шензьӧданаторъяс? Кулӧмаяс ӧмӧй чеччасны да пондасны ошкыны Тэнӧ?

¹² Гуын ӧмӧй юӧртӧны Тэнсьыд буралӧмтӧ, пыдӧстӧминын – Тэнсьыд збыльтӧ?

¹³ Пемыдінын ӧмӧй тӧдӧны Тэнсьыд шензьӧданаторъястӧ, вунӧдӧмаяслӧн муын – Тэнсьыд веськыдлунтӧ?

¹⁴ Но ме, Господьӧй, шыася Тэ дінӧ, водз асывсянь ме кевмыся Тэныд.

¹⁵ Господьӧй, мыйла Тэ эновтін менӧ, дзебин меысь Ассьыд чужӧмбантӧ?

¹⁶ Томдырсянь ме ёна сьӧкыдала, унаысь вӧлі куланвыйын, ме нуа Тэӧн мӧдӧдӧм шогъяс, дзикӧдз вынтӧмми.

¹⁷ Тэнад скӧрлуныд муніс ме вывті, Тэнад повзьӧдлӧмыд уськӧдіс менӧ кок йылысь.

¹⁸ Ытва моз полӧмыс быд лун кытшалӧ менӧ, топӧдӧ менӧ быд боксянь.

¹⁹ Тэ ылыстін ме дінысь ёртъясӧс, мекӧд сӧмын пемыдыс. Ошкӧм.