Псалтыр 85 - Коми Библия 2023

85 Псалом

1 Давидлӧн кевмысьӧм.

¹ Давидлӧн кевмысьӧм. Господьӧй, копырт Ассьыд пельтӧ мелань, вочавидз меным, ӧд ме гӧль да коньӧр.

² Видз менсьым олӧмӧс, ӧд ме кывзыся Тэнсьыд. Енмӧй, мезды менӧ, Ассьыд кесйӧгтӧ, ӧд ме лача кута Тэ вылӧ.

³ Господьӧй, ло бур сьӧлӧма ме дінӧ, быд лун ме шыася Тэ дінӧ.

⁴ Господьӧй, гажӧд Ассьыд кесйӧгтӧ, Тэныд ме восьта ассьым сьӧлӧмӧс.

⁵ Господьӧй, Тэ бур да мелі сьӧлӧма, Тэ ёна буралан Тэнсьыд отсӧг корысьяс дінӧ.

⁶ Господьӧй, кыв менсьым кевмӧмӧс, кывзы менсьым кевмысьӧмӧс.

⁷ Шог дырйи ме шыася Тэ дінӧ, и Тэ вочавидзан меным.

⁸ Господьӧй, енъяс пӧвстын Тэ кодь мӧдыс абу, абуӧсь Тэ моз вӧчӧм уджъясыс.

⁹ Господьӧй, Тэ вӧчин став войтыръяссӧ. Найӧ локтасны да копыртчасны Тэ водзӧ, ошкасны Тэнсьыд нимтӧ.

¹⁰ Ӧд Тэ ыджыд, Тэ вӧчан шензьӧданаторъяс. Тэ – Ен, и мӧдыс абу.

¹¹ Господьӧй, велӧд менӧ Тэнад туйӧ, велӧд ветлыны Тэнад збыльыд серти, пукты менам сьӧлӧмӧ Тэнад нимысь полӧм.

¹² Господьӧй, менам Енмӧй, став сьӧлӧмсянь кута аттьӧавны Тэнӧ, кута помтӧг ошкыны Тэнсьыд нимтӧ.

¹³ Ӧд Тэнад буралӧмыд ме дінӧ вывті ыджыд, Тэ мездін менсьым олӧмӧс пыдӧстӧминысь.

¹⁴ Енмӧй, вылӧ кыпӧдчысьяс сувтісны меным паныд, лёк вӧчысьяс корсьӧны босьтны менсьым олӧмӧс, найӧ нинӧм туйӧ пуктӧны Тэнӧ.

¹⁵ Но Тэ, Господьӧй, бур да мелі сьӧлӧма Ен, Тэ дыр терпитан, ёна буралан да веськыда вӧчан.

¹⁶ Видзӧдлы ме вылӧ да ло бур сьӧлӧма ме дінӧ, сет меным, Аслад кесйӧглы, вынтӧ, мезды менӧ, Аслад кесйӧг аньлысь писӧ.

¹⁷ Петкӧдлы меным Ассьыд бурлунтӧ. Менӧ мустӧмтысьяс яналасны, кор аддзасны, мый Тэ, Господьӧй, отсалін меным да бурӧдін менӧ.