Псалтыр 84 - Коми Библия 2023

84 Псалом

¹ Сьылысьясӧн веськӧдлысьлы. Корей пиянлӧн псалом.

² Господьӧй, Тэ вӧлін бур сьӧлӧма Аслад муыд дінӧ, бӧр вайӧдін пленысь Яковсянь чужысьясӧс.

³ Тэ прӧститін Аслад войтырыдлысь лёк вӧчӧмсӧ, вевттин налысь став мыжсӧ.

⁴ Тэ ылыстін на дінысь Ассьыд лӧглунтӧ, кусӧдін Ассьыд ыпъялысь скӧрлунтӧ.

⁵ Енмӧй, миянӧс Мездысьӧй, выльысь сувтӧд миянӧс, дугды лӧгавнытӧ миян вылӧ.

⁶ Помтӧг ӧмӧй пондан лӧгавны миян вылӧ, Тэнад скӧрлуныд ӧмӧй нюжалас чужысьяссянь чужысьясӧдз?

⁷ Он ӧмӧй выльысь ловзьӧд миянӧс, медым Тэнад войтырыд вермис нимкодясьны Тэӧн?

⁸ Господьӧй, петкӧдлы миянлы Ассьыд буралӧмтӧ, мезды миянӧс!

⁹ Ме кывза, мый висьталас Господь Ен. Сійӧ кӧсйысьӧ сетны лӧнь олӧм Аслас эскана войтырлы. Сӧмын найӧ мед бӧр оз сетчыны мывкыдтӧм оласногас.

¹⁰ Сійӧ регыд нин мездас Сыысь полысьясӧс, Сылӧн дзирдлуныс лоас миян му вылын.

¹¹ Буралӧмыс да збыльыс паныдасясны, веськыдлуныс да лӧньлуныс окыштчасны.

¹² Збыльыс кыпӧдчӧ мусянь, веськыдлуныс видзӧдӧ енэжсянь.

¹³ Господь сетас миянлы бурсӧ, муыс козьналас ассьыс быдтассӧ.

¹⁴ Веськыдлуныс мунӧ Господь водзвылын да дасьтӧ Сылы туйсӧ. Ошкӧм.