Псалтыр 83 - Коми Библия 2023

83 Псалом

¹ Сьылысьясӧн веськӧдлысьлы. Ворсӧны гефса ворсанторйӧн. Корей пиянлӧн псалом.

² Кутшӧм мичаӧсь Тэнад оланінъясыд, Господь Саваоф!

³ Менам лолӧй ёна гажтӧмтчӧ, ме ёна кӧсъя пырны Господьлӧн крам йӧрӧ, менам сьӧлӧмӧй да вир-яйӧй нимкодясьӧны ловъя Ен водзын.

⁴ Господь Саваоф, менам Ӧксыӧй да Енмӧй! Тэнад висьпуктанін дорын весиг лэбач аддзӧ аслыс оланін, чикыш вӧчӧ аслыс поз, медым быдтыны сэні пиянсӧ.

⁵ Шудаӧсь Тэнад керкаын олысьяс, найӧ дугдывтӧг ошкӧны Тэнӧ.

⁶ Шуда сійӧ мортыс, кодлӧн выныс Тэсянь, коді сьӧлӧмсянь кӧсйӧ локны Тэнад крамӧ.

⁷ Бӧрдан сёртасӧд мунысьяслы воссьӧ сэні ва петанін, зэрыс кисьтӧ сэні бурсиӧмсӧ.

⁸ Найӧ восьлалӧны да вынсялӧны, локтӧны Ен водзӧ Сионӧ.

⁹ Господьӧй, Ен Саваоф, кыв менсьым кевмӧмӧс, сибӧд сійӧс, Яковлӧн Енмӧй!

¹⁰ Енмӧй, миянӧс Дорйысьӧй, видзӧдлы Аслад Мавтыштӧмаыд вылӧ.

¹¹ Тэнад крамбердса йӧръясын ӧти луныс бурджык мукӧдлаын сюрс лун коллялӧм дорысь. Бурджык овны Енлӧн крам дзиръя дорын лёк вӧчысьяслӧн керкаын олӧм дорысь.

¹² Ӧд Господь Ен – шондіыс да сайӧдыс, Господь сетӧ буралӧмсӧ да нимӧдӧмсӧ. Сӧстӧма олысьяслы Сійӧ лышкыда бурсӧ сетӧ.

¹³ Шуда сійӧ мортыс, коді лача кутӧ Тэ вылӧ, Господь Саваоф.