Псалтыр 82 - Коми Библия 2023

82 Псалом

¹ Сьыланкыв. Асафлӧн псалом.

² Енмӧй, эн чӧв ов! Эн ланьтӧдчы, дугды чӧв овны!

³ Ӧд Тэныд паныд сувтысьяс шызьӧны, Тэнӧ мустӧмтысьяс кыпӧдӧны ассьыныс юрнысӧ.

⁴ Найӧ сёрнитчӧны лёк вӧчны Тэнад войтырлы – налы, кодъясӧс Тэ видзан.

⁵ Найӧ шуалӧны, мунам пӧ да бырӧдам найӧс войтыръяс пӧвстысь, медым Израиль нимсӧ весиг вунӧдасны.

⁶ Тэныд паныд сёрнитчисны, ӧтвыв йитӧд кӧрталісны

⁷ Эдомын олысьяс да Измаилсянь чужысьяс, моавсаяс да Агарсянь чужысьяс,

⁸ гевал, аммон да амалик войтыръяс, филистимсаяс да Тирын олысьяс.

⁹ Накӧд ӧтувтчисны тшӧтш ассурсаяс, локтісны отсавны Лот пиянлы.

¹⁰ Енмӧй, Тэ вӧч налы сійӧ жӧ, мый вӧчин мадиансаяслы, мый вӧчин Кишон ю дорын Сисарлы да Явинлы.

¹¹ Тайӧ кык мортсӧ виисны Эн-Дорын, налӧн шойясыс лоины муыслы куйӧдӧн.

¹² Тэныд паныд сувтысьяслӧн ӧксыяслы вӧч сійӧ жӧ, мый вӧчин Оривлы да Зивлы. Вӧч налӧн юралысьяслы сійӧ жӧ, мый вӧчин Зевейлы да Салманлы,

¹³ кодъяс шуалісны: «Босьтам аслыным Енлысь муяссӧ».

¹⁴ Енмӧй, вӧч Тэныд паныд сувтысьясӧс тӧвнырӧн кыпӧдан бус кодьӧн, тӧлӧн нӧбӧдан идзас кодьӧн.

¹⁵ Кыдзи яр би сотӧ вӧр, кыдзи ыпъялысь би чишкалӧ керӧсъяс,

¹⁶ сідзи жӧ Тэ вӧтлы найӧс Аслад ыджыд тӧвнырӧн, повзьӧд найӧс Аслад бушколӧн.

¹⁷ Господьӧй, янӧд найӧс, медым найӧ корсисны Тэнӧ.

¹⁸ Мед найӧ пыр кежлӧ яналасны да шӧйӧвошасны, мед налӧн олан лунъясыс помасясны яналӧмӧн.

¹⁹ Мед найӧ тӧдмаласны, мый Тэнад нимыд – Господь, Тэ ӧтнад Медвылыссаыс, Тэ ыджыдалан став му пасьтала.