Псалтыр 80 - Коми Библия 2023

80 Псалом

¹ Сьылысьясӧн веськӧдлысьлы. Ворсӧны гефса ворсанторйӧн. Асафлӧн псалом.

² Долыда сьылӧй Енлы, Сійӧ – миян выныс! Гораа сьылӧмӧн ошкӧй Яковлысь Енсӧ!

³ Сьылӧй сьыланкыв, ворсӧй тимпанӧн, ворсӧй мичаа юргысь гуслиӧн да арфаӧн.

⁴ Буксӧй буксанӧн выль тӧлысь чужигӧн, миян гажӧдчан кадӧ, кор енэжас тӧлысьыс тырвыйӧ содас.

⁵ Ӧд тайӧ – Израиль войтырлы индӧд, Яковлӧн Енсянь тшӧктӧм.

⁶ Тайӧ тшӧктӧмсӧ Енмыс сетіс Ӧсиплӧн рӧдлы, кор петіс Египетлы паныд. Сэні найӧ кылісны кывъяс, кодъясӧс водзынджык эз кывлыны.

⁷ Енмыс шуис: «Ме лэдзи пельпом вывсьыд сьӧкыд ноптӧ, мезді китӧ сьӧкыдтор новлӧдлӧмысь.

⁸ Сьӧкыдалігад тэ шыасин Ме дінӧ, и Ме мезді тэнӧ. Гым пытшсянь Ме вочавидзи тэныд, Мерива ва дорын тӧдмалі тэнӧ.

⁹ Кывзы, Менам войтырӧй, Ме ӧлӧда тэнӧ. Тэ кӧ эськӧ кывзысин Менсьым, Израиль!

¹⁰ Мед оз лоны тэнад мукӧд енъяс, мукӧд войтырлӧн енъяслы эн копрась.

¹¹ Ме – Господь, тэнад Енмыд, Ме петкӧді тэнӧ Египет муысь. Восьт ассьыд вомтӧ, и Ме тырта сійӧс.

¹² Но Менам войтырӧй эз кывзы Менӧ, Израиль эз кывзысь Менсьым.

¹³ Та вӧсна Ме эновті найӧс, коли найӧс овны чорзьӧм сьӧлӧмӧн, асланыс кӧсйӧм серти.

¹⁴ Менам войтырӧй кӧ кывзіс Менӧ, Израиль войтыр кӧ ветліс Менам туйясӧд,

¹⁵ Ме эськӧ ӧдйӧ ланьтӧді налысь вӧрӧгсӧ, Ассьым киӧс эськӧ лэпті найӧс дзескӧдысьяслы паныд,

¹⁶ Менӧ мустӧмтысьяс эськӧ леститчисны Ме водзын, и тайӧ вӧлі эськӧ налӧн пайыс нэмъяс чӧж.

¹⁷ А Ассьым войтырӧс Ме эськӧ верді медбур шобді няньӧн, пӧткӧді найӧс изкыртаысь босьтӧм маӧн». Ошкӧм.