Псалтыр 79 - Коми Библия 2023

79 Псалом

¹ Сьылысьясӧн веськӧдлысьлы. Сьылӧны ”Шушан эдут” шылад улӧ. Асафлӧн псалом.

² Израильӧс Видзысь, кывзы миянӧс! Ыж видзысь моз Тэ нуӧдан Ӧсиплысь пиянсӧ. Тэ, коді пукалан херувимъяс вылын, петкӧдчы дзирдлуннад!

³ Петкӧдлы Ассьыд вынтӧ, Ефрем, Венямин да Манассей чужанкотыръяслы! Лок миянӧс мездыны!

⁴ Енмӧй, выльысь сувтӧд миянӧс! Сет миянлы аддзыны Тэнсьыд югыд чужӧмбантӧ, сэки ми мездмам.

⁵ Господьӧй, Ен Саваоф, дыр-ӧ на Тэ кутан скӧравны Аслад войтырыд вылӧ, ӧтдортны кевмысьӧмнымӧс?

⁶ Няньӧн моз Тэ вердін миянӧс синваӧн, уна синваӧн юктӧдін миянӧс.

⁷ Орччӧн олысьяслы Тэ вӧчин миянӧс лёкӧданторйӧн, мустӧмтысьяс сералӧны миян вылын.

⁸ Ен Саваоф, выльысь сувтӧд миянӧс! Сет миянлы аддзыны Тэнсьыд югыд чужӧмбантӧ, сэки ми мездмам.

⁹ Египетысь Тэ вайин виноград вожтӧ, вӧтлін войтыръясӧс, а вожтӧ вужйӧдін.

¹⁰ Мусӧ Тэ весалін, виноградтӧ сэтчӧ вужйӧдін, и сійӧ паськаліс му пасьталаыс.

¹¹ Сылӧн вуджӧрыс вевттис керӧсъяс, сылӧн вожъясыс вевттисны Енлысь сус пуяссӧ.

¹² Сылӧн петасъясыс нюжӧдчисны саридз дорӧдз, паськалісны ю дорӧдз.

¹³ Мыйла тэ кисьтін сылысь потшӧсъяссӧ? Сы дінті мунысьяс нетшкӧны сылысь розъяссӧ.

¹⁴ Вӧрпорсь йирӧ сійӧс, вӧрса звер куштӧ сійӧс.

¹⁵ Ен Саваоф, бергӧд Ассьыд чужӧмбантӧ, видзӧдлы енэжсянь, видзӧдлы да волы видлыны тайӧ виноград йӧрсӧ.

¹⁶ Видз сійӧс, мый пуктін Аслад веськыд кинад. Видз пиӧс, кодӧс Тэ Аслыд быдтін-ёнмӧдін.

¹⁷ Тэнсьыд виноградтӧ кералӧма, сотӧма биын, Тэнад скӧр видзӧдласысь сылӧн петасъясыс кулісны.

¹⁸ Тэнад киыд мед видзас морт пиӧс, кодӧс Тэ Аслыд быдтін-ёнмӧдін, сійӧс, коді пукалӧ Тэнад веськыдладорын.

¹⁹ Тэысь ми огӧ кежӧй. Ловзьӧд миянӧс, и ми шыасям Тэ дінӧ.

²⁰ Господьӧй, Ен Саваоф, выльысь сувтӧд миянӧс! Сет миянлы аддзыны Тэнсьыд югыд чужӧмбантӧ, сэки ми мездмам.