Псалтыр 77 - Коми Библия 2023

77 Псалом

1 Асафлӧн сьыланкыв.

¹ Асафлӧн сьыланкыв. Менам войтырӧй, кывзӧй менсьым велӧдӧмӧс, сюся кывзӧй менсьым кывъясӧс.

² Ме сёрнита тіянкӧд шусьӧгъясӧн, висьтала тіянлы важся нӧдкывъяс.

³ Мый кывлім да тӧдмалім, мый батьяс миянлы висьтавлісны,

⁴ сійӧс ми огӧ дзебӧй ас войтырысь, а висьталам водзӧ чужысьяслы Господьлӧн ошкана уджъясыс йылысь, Сылӧн выныс да шензьӧданаторъясыс йылысь.

⁵ Господь сетіс тшӧктӧмъяс Яков рӧдлы, Индӧдсӧ сетіс Израиль войтырлы, тшӧктіс миян батьяслы велӧдны Индӧдӧ ассьыныс челядьсӧ,

⁶ медым тӧдісны та йылысь на бӧрся чужысьяс, медым насянь чужысьяс сэсся висьтавлісны асланыс челядьлы.

⁷ Найӧ мед лача кутасны Ен вылӧ, мед оз вунӧдны Енлысь уджъяссӧ, а Енлысь тшӧктӧмъяссӧ мед видзасны сьӧлӧманыс.

⁸ Найӧ мед оз лоны асланыс батьяс кодьӧсь: асныраӧсь да паныд кыпӧдчысьяс, Енлысь кывзысьтӧмъяс да Сыысь кежысьяс.

⁹ Ефремсаяслӧн вӧліны шыпуртъяс да ньӧввужъяс, но тыш дырйи найӧ пышйисны.

¹⁰ Асныраяс эз видзны Енлысь йитӧдсӧ, эз кӧсйыны овны Сылӧн Индӧд серти.

¹¹ Найӧ вунӧдісны Сылысь уджъяссӧ, шензьӧданаторъяссӧ, мый Сійӧ петкӧдліс налы.

¹² Налӧн батьяслӧн син водзын Енмыс вӧчис шензьӧданаторъяс Египет муын, Цоан эрд вылын.

¹³ Сійӧ шӧрипӧв поткӧдіс саридз да вуджӧдіс найӧс, васӧ ӧтар-мӧдар бокас сувтӧдіс стен моз.

¹⁴ Луннас нуӧдіс найӧс кымӧр отсӧгӧн, войнас югзьӧдіс налысь туйсӧ биӧн.

¹⁵ Овтӧминын поткӧдіс изкырта, джуджыд юкмӧсысь моз юктӧдіс найӧс ваӧн.

¹⁶ Сійӧ сетіс валы ыльӧбтыны изкыртаысь, и ваыс визувтіс ю моз.

¹⁷ Но найӧ водзӧ Енлы паныд мыж вӧчисны, дӧзмӧдісны Медвылыссаӧс овтӧминын.

¹⁸ Найӧ тӧдӧмӧн дӧзмӧдісны Енсӧ, корисны Сылысь сёян сьӧлӧм сертиныс.

¹⁹ Найӧ шуасисны Енлы паныд да сёрнитісны: «Енмыс ӧмӧй вермас овтӧминын дасьтыны чӧскыд пызан?

²⁰ Дерт, кор Сійӧ вартіс изкыртаӧ, сэтысь ыльӧбтіс ва да визувтісны шоръяс. Но вермас-ӧ Сійӧ сетны нянь да вердны Ассьыс войтырсӧ яйӧн?»

²¹ Господь кыліс тайӧс да тырис лӧглунӧн, биыс ыпнитіс Яковлӧн рӧд пӧвстын, Енмыс чорыда скӧрмис Израиль войтыр вылӧ,

²² ӧд найӧ эз эскыны Сылы, эз кутны лача, мый Сійӧ мездас найӧс.

²³ Но Енмыс восьтіс енэжвыв ӧдзӧсъяс, вылісянь тшӧктіс кымӧръяслы

²⁴ зэр моз кисьтны на вылӧ манна, сетіс налы сёйны енэжвыв нянь.

²⁵ Йӧзыс сёйисны анделъяслысь нянь, Енмыс найӧс пӧттӧдзныс вердіс.

²⁶ Енэжсянь Сійӧ мӧдӧдіс асыв тӧв, Аслас вынӧн кыпӧдіс лун тӧв.

²⁷ Сійӧ кисьтіс на вылӧ бус мында яй, мӧдӧдіс налы лыа мында лэбач.

²⁸ Лэбачьяссӧ уськӧдіс налӧн сувтанін шӧрӧ, налӧн чомъяс дорӧ,

²⁹ и найӧ пӧттӧдзныс сёйисны, Енмыс сетіс налы кӧсйӧм сертиныс.

³⁰ Но найӧ эз дугдыны горшасьнысӧ, налӧн сёяныс вӧлі воманыс на,

³¹ кор Енлӧн скӧрлуныс суис найӧс. Сійӧ бырӧдіс на пӧвстысь медся вынаяссӧ, виис израильса том йӧзӧс.

³² Но та вылӧ видзӧдтӧг найӧ эз ӧвсьыны мыж вӧчӧмсьыс, эз эскыны Сылӧн шензьӧдана уджъясӧ.

³³ Та вӧсна налӧн олан лунъясыс виччысьтӧг помасисны, налӧн олӧмыс ру моз бырис.

³⁴ Кор Енмыс бырӧдліс найӧс, сэки найӧ корсисны Енсӧ, бӧр локтісны Сы дінӧ, ёна корсисны Сійӧс.

³⁵ Найӧ гӧгӧрвоисны, мый Енмыс – налӧн Дорйысьыс, Медвылысса Енмыс – найӧс Мездысьыс.

³⁶ Но асланыс кывъясӧн найӧ леститчисны Сы дінӧ, асланыс вомнас ылӧдлісны Сійӧс.

³⁷ Налӧн сьӧлӧмныс эз вӧв веськыд Сы водзын, найӧ торкисны йитӧдсӧ, мый Сійӧ кӧрталіс накӧд.

³⁸ Но Енмыс мелі сьӧлӧма, Сійӧ вештіс налысь мыжсӧ, эз бырӧд найӧс. Сійӧ унаысь ылыстліс на дінысь Ассьыс лӧглунсӧ, эз кисьт на вылӧ Ассьыс скӧрлунсӧ.

³⁹ Сійӧ тӧдіс, мый найӧ сӧмын вир-яй, сӧмын ловшы, коді петӧ да бӧрсӧ оз бергӧдчы.

⁴⁰ Кымынысь найӧ дӧзмӧдлісны Сійӧс овтӧминын, скӧрмӧдлісны Сійӧс кушинын!

⁴¹ Найӧ выльысь и выльысь дӧзмӧдісны Енмӧс, омӧльтісны Израильлысь вежа Енсӧ.

⁴² Найӧ вунӧдісны Енлысь вына кисӧ да лунсӧ, кор Сійӧ мездіс найӧс нартитӧмысь.

⁴³ Египет муын Енмыс петкӧдліс индысьпасъяс, Цоан эрд вылын вӧчис шензьӧданаторъяс.

⁴⁴ Египетса ваяссӧ да юяссӧ Сійӧ пӧртіс вирӧ, и сэтысь эз позь юны васӧ.

⁴⁵ Сійӧ мӧдӧдіс лӧдз-гутӧс курччавны египетсаясӧс, мӧдӧдіс жабаясӧс тшыкӧдны мусӧ.

⁴⁶ Налысь быдтассӧ Енмыс сетіс лёльӧяслы, пуктассӧ – саранчалы.

⁴⁷ Налысь виноградсӧ жугліс шерӧн, инжир пуяссӧ – йиа зэрӧн.

⁴⁸ Налысь пемӧссӧ бырӧдіс шерӧн, ыжъяссӧ да ӧшъяссӧ виис чардбиӧн.

⁴⁹ Енмыс кисьтіс на вылӧ ыпъялан скӧрлунсӧ, лӧглунсӧ да ярлунсӧ, мӧдӧдіс налы уна сьӧкыдлун да найӧс бырӧдысь андел чукӧрӧс.

⁵⁰ Сійӧ восьтіс ӧдзӧсъяс Аслас скӧрлунлы, эз видз египетсаясӧс кулӧмысь, бырӧдіс налысь пемӧссӧ пӧрӧс висьӧмӧн,

⁵¹ виис Египетысь медводдза чужысь пиянӧс, Хамлӧн чомъясысь – став медводдза чужысьсӧ.

⁵² Енмыс нуӧдіс Ассьыс войтырсӧ ыжъясӧс моз, нуӧдіс найӧс овтӧминӧд ыж чукӧрӧс моз.

⁵³ Сылӧн нуӧдӧм улын налы нинӧмысь вӧлі повнысӧ, а на бӧрся вӧтчысьясӧс пӧдтіс саридз.

⁵⁴ Израиль войтырӧс Сійӧ вайӧдіс Аслас вежа оланінӧ, керӧсӧ, мый веськыд кинас босьтіс Аслыс.

⁵⁵ Аслас войтыр водзысь Сійӧ вӧтліс мукӧд войтыръясӧс, юкліс налысь мусӧ да вичмӧдіс израильса чужанкотыръяслы, мукӧд войтыръяслӧн чомъясӧ овмӧдіс Ассьыс войтырсӧ.

⁵⁶ Но Израиль войтыр водзӧ дӧзмӧдіс Медвылысса Енмӧс, эз видз сьӧлӧмас Сылысь тшӧктӧмъяссӧ.

⁵⁷ Асланыс батьяс моз найӧ эновтісны Енсӧ, личалӧм ньӧввуж моз лоины шогмытӧмӧсь.

⁵⁸ Вись ваян мылькъяснаныс найӧ дӧзмӧдісны Енсӧ, бӧлбанъяслы юрбитӧмнас найӧ кыпӧдісны Сы пытшкын вежӧгтӧм.

⁵⁹ Тайӧс аддзӧмысь Енмыс пузис скӧрлунӧн, дзикӧдз эновтіс Израиль войтырӧс.

⁶⁰ Сійӧ эновтіс Ассьыс силомса оланінсӧ, вежа чомсӧ, кӧні Сійӧ оліс йӧз пӧвстын.

⁶¹ Йитӧд кудсӧ Сійӧ сетіс вӧрӧглӧн киӧ, Ассьыс вынсӧ да дзирдлунсӧ лэдзис мырддьыны.

⁶² Ассьыс войтырсӧ сетіс шыпурт улӧ, скӧрмис Аслас йӧзыс вылӧ.

⁶³ Том зонъясӧс ньылыштіс би, нывъяслы эз сьывны кӧлысьвывса сьыланкывъяс,

⁶⁴ попъяс кулісны шыпуртысь, дӧваяслы эз позь бӧрдӧдчыны.

⁶⁵ Сэки Господь быттьӧ унмысь садьмис, чеччис быттьӧ винаысь палялӧм тышкаморт,

⁶⁶ пасьвартіс Сійӧс мустӧмтысьясӧс, пыр кежлӧ янӧдіс найӧс.

⁶⁷ Господь эновтіс Ӧсипсянь чужысьясӧс, эз бӧрйы Ефремлысь чужанкотырсӧ,

⁶⁸ но бӧрйис Иудалысь чужанкотырсӧ да Ассьыс муса Сион керӧссӧ.

⁶⁹ Сійӧ сувтӧдіс сэтчӧ Ассьыс вежаинсӧ, вӧчис сійӧс енэжыс кодь джуджыдӧн, муӧс моз зумыда сувтӧдіс сійӧс нэмъяс кежлӧ.

⁷⁰ Сійӧ бӧрйис Давидӧс, Ассьыс кесйӧгсӧ, босьтіс сійӧс ыж йирсянінысь,

⁷¹ вайӧдіс сійӧс ыж чукӧр пӧвстысь, медым видзны Ассьыс войтырсӧ – Яковсянь чужысьясӧс, Израильӧс – Ассьыс бӧрйӧмаясӧс.

⁷² Давид видзис найӧс сӧстӧм сьӧлӧмӧн, веськӧдліс наӧн бур мывкыдӧн. Ошкӧм.