Псалтыр 76 - Коми Библия 2023

76 Псалом

¹ Едутунлы, сьылысьясӧн веськӧдлысьлы. Асафлӧн псалом.

² Ме гораа шыася Ен дінӧ, ме шыася Ен дінӧ, и Сійӧ кылас менӧ.

³ Аслам шогалігӧн ме корся Господьӧс, войбыд нюжӧда киӧс Сылань да ог лэдзлы, менам сьӧлӧмӧй нинӧмӧн оз бурась.

⁴ Кор казьтывла Ен йылысь, менӧ дзӧрӧдӧ, кор мӧвпала Сы йылысь, менсьым лолӧс личкӧ.

⁵ Енмӧй, Тэ он лэдз меным куньны синмӧс, ме ловнам усьӧма, ог вермы весиг сёрнитны.

⁶ Ме мӧвпала важ олӧм йылысь, воддза кадыс йылысь.

⁷ Войнас ме казьтывла ассьым сьыланкывъясӧс, мӧвпала да кӧсъя тӧдны,

⁸ Господь ӧмӧй пыр кежлӧ эновтіс, Сійӧ ӧмӧй оз нин радейт менӧ?

⁹ Сылӧн буралӧмыс ӧмӧй пыр кежлӧ помасис, чужысьяссянь чужысьясӧдз Сійӧ ӧмӧй кутас чӧв овны?

¹⁰ Енмыс ӧмӧй вунӧдіс Ассьыс буралӧмсӧ, скӧралігас ӧмӧй дзикӧдз тупкис сьӧлӧмсӧ?

¹¹ Ме шуи: «Ыджыд шог меным, ӧд Медвылыссаыс оз нин кутышт менӧ Аслас кинас».

¹² Но ме кута казьтывлыны Господьлӧн уджъяс йылысь, Сылӧн важся шензьӧданаторъяс йылысь.

¹³ Кута мӧвпавны Тэнад уджъяс йылысь, Тэнад ыджыд уджъяс йылысь.

¹⁴ Енмӧй, Тэнад туйыд вежа, Тэ – миян ыджыд Ен!

¹⁵ Тэ – Ен, Тэ вӧчан шензьӧданаторъяс, Тэ петкӧдлін Ассьыд вынтӧ войтыръяс пӧвстын,

¹⁶ Аслад кинад Тэ мездін Ассьыд войтыртӧ, Яковлысь да Ӧсиплысь рӧдсӧ.

¹⁷ Ваяс аддзисны Тэнӧ, Енмӧй, найӧ аддзисны Тэнӧ да повзисны, весиг ва пыдӧсыс тіраліс.

¹⁸ Кымӧрсяньыс лэччис ва, енэжас муркакыліс-гымаліс, гымньӧвъясыд сявкйисны биӧн.

¹⁹ Тэнад гым шыыд разаліс енэж пасьтала, чардбиыд югзьӧдліс муюгыдсӧ, муыс вӧрис да сыркакыліс.

²⁰ Тэнад туйыд муніс саридз пыр, Тэнад кок туйыд – джуджыд ваӧд, но Тэнсьыд воськовъястӧ некод эз аддзыв.

²¹ Ыжъясӧс моз Тэ нуӧдін Ассьыд войтыртӧ, Мӧисей да Аарон веськӧдлісны наӧн. Ошкӧм.