Псалтыр 74 - Коми Библия 2023

74 Псалом

¹ Сьылысьясӧн веськӧдлысьлы. Сьылӧны ”Эн бырӧд” шылад улӧ. Асафлӧн псалом. Сьыланкыв.

² Енмӧй, ошкам Тэнӧ, ошкам, ӧд Тэ матын. Йӧзыс висьтавлӧны Тэнад шензьӧдана уджъясыд йылысь.

³ Ме, Господь, урчита колана кадсӧ да кута веськыда мыждыны.

⁴ Муыс да сы вылын став олысьыс сыркмунласны, но Ме зумыда кута муыслысь сюръяяссӧ.

⁵ Мывкыдтӧмъяслы Ме шуа: «Энӧ йӧйталӧй!» Лёк вӧчысьясӧс Ме ӧлӧда: «Энӧ чургӧдӧй ассьыныд сюрнытӧ!

⁶ Энӧ ышнясьӧй, [Енлы паныд] тшапа энӧ сёрнитӧй».

⁷ Ӧд мортсӧ вылӧ кыпӧдӧмыс оз во асыввывсянь, рытыввывсянь либӧ овтӧминсянь,

⁸ но Енмыс эм Мыждысьыс: ӧтиӧс Сійӧ лэдзӧ, мӧдӧс – кыпӧдӧ.

⁹ Господь киын чашаыс, сэні быгзьӧ чорыд вина. Сійӧ кисьталӧ сэтысь лёк вӧчысьяслы, и найӧ юӧны, юӧны весиг пыдӧссьыс став гудырсӧ.

¹⁰ А ме кута помтӧг нимӧдны Господьӧс, кута сьылӧмӧн ошкыны Яковлысь Енсӧ.

¹¹ Сійӧ чегъялас Ентӧг олысьяслысь сюръяссӧ, а веськыда олысьясӧс вылӧ кыпӧдас.