Псалтыр 73 - Коми Библия 2023

73 Псалом

1 Асафлӧн сьыланкыв.

¹ Асафлӧн сьыланкыв. Енмӧй, мыйла Тэ дзикӧдз эновтін миянӧс, мыйла Тэ ыпъялан-скӧралан Аслад ыж чукӧр вылӧ?

² Эн вунӧд Ассьыд войтыртӧ, Тэ ӧд бӧрйин сійӧс важысянь, ньӧбин, медым сійӧ вӧлі Тэнад войтырӧн. Эн вунӧд Сион керӧстӧ, Ассьыд оланінтӧ.

³ Лок видзӧдлы из чукӧр вылӧ, вӧрӧг жугліс вежа крам.

⁴ Тэнӧ мустӧмтысьяс равзӧны войтырыдлӧн вежа чукӧртчанінас, найӧ лэптісны сэтчӧ ассьыныс дӧрапас.

⁵ Вӧр пӧрӧдысьяс моз найӧ ӧвтчисны чернаныс.

⁶ Черъясӧн да пыридзьясӧн найӧ жуглісны крамысь став серпасалӧмторсӧ.

⁷ Найӧ сотісны Тэнсьыд вежаинтӧ, пежалісны Тэнад нимлысь оланінсӧ.

⁸ Найӧ мӧвпыштісны: «Ми дзикӧдз бырӧдам найӧс», и сотісны миян муысь Енлысь вежаинъяссӧ.

⁹ Индысьпасъяс ми огӧ нин аддзӧй, миян пӧвстын эз нин коль пророкыс, некод миян пӧвстысь оз тӧд, дыр-ӧ тадзи лоӧ.

¹⁰ Енмӧй, дыр-ӧ на дзескӧдысь пондас лёкӧдны миянӧс, дыр-ӧ на мустӧмтысь пондас омӧльтны Тэнсьыд нимтӧ?

¹¹ Мыйла Тэ дзебан Ассьыд китӧ? Лэпты веськыд китӧ да пасьварт найӧс!

¹² Енмӧй, Тэ водзысяньыс менам Ӧксы, Тэ вӧчан му вылас ыджыд уджъяс.

¹³ Аслад вынӧн Тэ поткӧдін саридзсӧ, жугӧдін саридзса гундыръяслысь юръяссӧ.

¹⁴ Тэ пасьвартін юрсӧ левиафанлысь, сетін сійӧс сёйны [эфиопияса] овтӧминын олысь йӧзлы.

¹⁵ Ва петанінъяслы да шоръяслы Тэ восьтін туйяс, а ыджыд юяссӧ Тэ косьтін.

¹⁶ Луныс да войыс – Тэнад, Тэ вӧчин тӧлысьсӧ да шондісӧ.

¹⁷ Тэ мурталін муыслысь помъяссӧ, дасьтін тӧвсӧ да гожӧмсӧ.

¹⁸ Господьӧй, эн вунӧд, мый мустӧмтысь лёкӧдӧ Тэнӧ, мывкыдтӧм йӧз омӧльтӧны Тэнсьыд нимтӧ.

¹⁹ Эн сет зверъяслы косявлыны Ассьыд гулютӧ, пыр кежлӧ эн вунӧд Ассьыд гӧль йӧзтӧ.

²⁰ Эн вунӧд Ассьыд йитӧдтӧ, ӧд му вылас став пемыд пельӧсыс тырӧма виалӧм-дзескӧдӧмӧн.

²¹ Увтыртӧмаяс бӧрсӧ мед оз бергӧдчыны яналӧмаӧн, корысьяс да коньӧръяс мед ошкасны Тэнсьыд нимтӧ.

²² Енмӧй, кыпӧдчы да дорйы Ассьыд нимтӧ, эн вунӧд, мый мывкыдтӧм йӧз быд лун лёкӧдӧны Тэнӧ.

²³ Эн вунӧд Тэнӧ мустӧмтысьяслысь горзӧмсӧ, Тэныд паныд кыпӧдчысьяс ӧтарӧ шызьӧны. Ошкӧм.