Псалтыр 72 - Коми Библия 2023

72 Псалом

1 Асафлӧн псалом.

¹ Асафлӧн псалом. Енмыс сэтшӧм бур Израиль войтыр дінӧ, сӧстӧм сьӧлӧмаяс дінӧ!

² Ӧдва эз крукась менам кокӧй, ӧдва эз вильды,

³ ӧд ме вежалі лёк вӧчысьяслы, кор аддзи налысь бур олӧмсӧ.

⁴ Найӧ нинӧмысь оз шогавны, найӧ ёнӧсь да дзоньвидзаӧсь.

⁵ Найӧ оз уджавны пӧсь петтӧдз, мукӧд йӧзсӧ моз оз топӧд найӧс сьӧкыд олӧм.

⁶ Та вӧсна найӧ сикӧтшӧн моз мичмӧдӧмаӧсь асьнысӧ ышнясьӧмнас, мича паськӧмӧн моз вевттьӧмаӧсь асьнысӧ виалӧм-дзескӧдӧмнас.

⁷ Тшӧгнысла налӧн синныс бердӧма, налӧн мӧвпъясныс жуӧны-бергалӧны.

⁸ Найӧ сералӧны да лёкӧдӧны, суклясьӧны да ышнясьӧмӧн сёрнитӧны.

⁹ Сёрнинас найӧ сувтӧны енэжлы паныд, налӧн лёк кывъясыс паськалӧны став му пасьтала.

¹⁰ Лёк вӧчысьяс дінӧ бергӧдчӧ тшӧтш Енлӧн войтырыс, ва моз пӧтлытӧг юӧ налысь лёк кывъяссӧ.

¹¹ Найӧ шуалӧны: «Кытысь Енмыс тӧдмалас? Медвылыссаыс ӧмӧй тӧдӧ та йылысь?»

¹² Татшӧмӧсь лёк вӧчысьяс, найӧ лӧня олӧны, пыр озырмӧдчӧны.

¹³ Ме шуи: «Весьшӧрӧ-ӧ ме видзи ассьым сьӧлӧмӧс сӧстӧмӧн, ассьым киӧс мыжтӧмӧн?

¹⁴ Быд лун менӧ дойдалӧны, быд асыв – янӧдӧны».

¹⁵ Но ме кӧ шуи, мый кута на моз сёрнитны, ме эськӧ мыжа вӧлі Тэнад войтырыд водзын.

¹⁶ Ме мӧвпалі, кыдзи меным гӧгӧрвонысӧ, но тайӧ сьӧкыд вӧлі меным,

¹⁷ кытчӧдз ме эг пыр Енлӧн вежаинӧ и эг гӧгӧрво, мый виччысьӧ лёк вӧчысьясӧс.

¹⁸ Тэ сувтӧдан найӧс вильыд туй вылӧ, шыбитан найӧс пыдӧстӧм гуӧ.

¹⁹ Ӧти здукӧн найӧс лоӧ бырӧдӧма, найӧ вошасны, налӧн олӧмныс лёка помасяс.

²⁰ Кыдзи садьмӧм бӧрын ми вунӧдам вӧтнымӧс, тадзи Тэ, Господьӧй, чеччан да вуштыштан найӧс.

²¹ Кор менам сьӧлӧмӧй сотчис, кор пытшкӧсӧй вӧлі топалӧма сьӧкыд дойясысь,

²² сэки ме вӧлі мывкыдтӧм, нинӧм эг гӧгӧрво, ме вӧлі Тэ водзын вежӧртӧм пемӧс кодь.

²³ Но ме пыр Тэкӧд, Тэ кутан менӧ веськыд киӧд.

²⁴ Тэ туйдӧдан да нуӧдан менӧ, вайӧдан менӧ Аслад дзирдлунӧ.

²⁵ Енэжас Тэысь кындзи некод менам абу, и кор ме Тэкӧд, му вылас меным нинӧм оз ков.

²⁶ Менам вир-яйӧй да сьӧлӧмӧй жебмӧны, но Енмыс – менам сьӧлӧмлӧн зумыдлуныс, менам олан пайыс нэмъяс чӧж.

²⁷ Тэ дінысь ылыстчысьяс кулӧны, Тэнӧ эновтысьясӧс Тэ бырӧдан.

²⁸ А меным нимкодь матыстчыны Ен дінӧ, ме лача кута Господь Ыджыдӧй вылӧ, висьтавла Сылӧн уджъясыс йылысь [сионса дзиръяяс дорын].