Псалтыр 71 - Коми Библия 2023

71 Псалом

1 Соломон йылысь [Давидлӧн псалом].

¹ Соломон йылысь [Давидлӧн псалом]. Енмӧй, велӧд ӧксыӧс Тэ моз веськыда мыждыны, туйдӧд ӧксылысь писӧ Тэ моз веськыда вӧчны.

² Ӧксы мед веськыда мыждас Тэнсьыд войтыртӧ, ёрд вылын мед доръяс гӧльясӧс.

³ Керӧсъяс мед ваясны йӧзыслы лӧньлун, мылькъяс – веськыдлун.

⁴ Ӧксы мед доръяс войтыр пӧвстысь гӧльясӧс, мездас коньӧръяслысь челядьсӧ, но дзескӧдысьясӧс мед топӧдас.

⁵ Сэки войтырыс пондас повны Енмысь нэмъяс чӧж, кытчӧдз дзирдалас шонді да югъялас тӧлысь.

⁶ Ӧксы мед лоас ытшкӧм видз вылӧ киссьысь зэр кодь, мусӧ кӧтӧдысь сувтса зэр кодь.

⁷ Сылӧн ӧксыалан кадӧ веськыда олысь кутас дзоридзавны, му вылас лоӧ лӧнь олӧм, кытчӧдз оз кус тӧлысьыс.

⁸ Ӧксы мед ыджыдалас саридзсянь саридзӧдз, Ефрат юсянь му помӧдз.

⁹ Сы водзӧ мед копыртчасны овтӧминын олысьяс, сійӧс мустӧмтысьяс мед нюласны мусӧ сы водзын.

¹⁰ Фарсисса да дівывса ӧксыяс мед мынтасны сылы вот, саваса да севаса ӧксыяс мед ваясны сылы козинъяс.

¹¹ Сы водзӧ мед копыртчасны ӧксыяс, войтыръяс мед кесъяласны сылы.

¹² Ӧд сійӧ мездас гӧль мортӧс, коді шыасьӧ отсӧгла, мездас коньӧр мортӧс, кодлы отсӧг сетысьыс абу.

¹³ Сійӧ лоӧ бур сьӧлӧма гӧльяс да коньӧръяс дінӧ, сійӧ видзас налысь олӧмсӧ.

¹⁴ Сійӧ мездас найӧс нартитӧмысь да виалӧм-дзескӧдӧмысь, налӧн олӧмыс ёна дона сылы.

¹⁵ Ӧксылӧн олӧмыс мед лоӧ кузь нэма, сылы мед ваясны Саваысь дона зарни, йӧзыс мед дугдывтӧг кевмысясны сы вӧсна, быд лун мед бурсиасны сійӧс.

¹⁶ Му вылын, весиг керӧсъяс вылын, тырмымӧн мед лоӧ няньыс, шепъясыс мед гыаласны ливанса вӧр моз, йӧзыс мед чужасны-быдмасны видзвывса турун моз.

¹⁷ Ӧксылысь нимсӧ мед ошкасны нэмъяс чӧж, сылысь нимсӧ мед оз вунӧдны, кытчӧдз югъялӧ шонді. Сійӧ лоӧ бурсиӧмӧн [став мувывса йӧзыслы], войтыръяс шуасны сійӧс майбырӧн.

¹⁸ Ошкӧм Господь Енлы, Израильлӧн Енлы, Сійӧ ӧтнасӧн вӧчӧ шензьӧданаторъяс.

¹⁹ Ошкӧм Сылӧн ыджыд нимлы нэмъяс чӧж! Сылӧн дзирдлуныс мед вевттяс став мусӧ! Аминь, аминь.

²⁰ Тайӧн помасьӧны Давидлӧн, Ессей пилӧн, кевмысьӧмъясыс. Ошкӧм.