Псалтыр 70 - Коми Библия 2023

70 Псалом

¹ Господьӧй, Тэ вылӧ лача кута, ме некор ог янав.

² Аслад веськыдлуныд вӧсна дорйы менӧ да мезды менӧ, копырт Ассьыд пельтӧ мелань да мезды менӧ!

³ Ло меным изкыртаӧн, кытчӧ ме верма быд кадӧ пышйыны. Тэ шуин менӧ мездыны, ӧд Тэ менам зумыд изйыс да сайӧдчаніныс.

⁴ Енмӧй, мезды менӧ Ентӧг олысьяслӧн киысь, мезды менӧ лёк вӧчысьясысь да дзескӧдысьясысь.

⁵ Господьӧй Ыджыдӧй, Тэ – менам лачаыс, том кадсянь Тэ вылӧ лача кута.

⁶ Мам кынӧмсянь Тэ вӧлін меным зумыд пыкӧдӧн, Тэ петкӧдін менӧ мам кынӧмысь. Ме дугдывтӧг ошка Тэнӧ.

⁷ Унаӧн шензьӧны ме вылӧ, но Тэ вылӧ ме зумыд лача кута.

⁸ Менам вомӧй мед тырас Тэнӧ ошкӧмӧн, [медым ме ошкӧмӧн сьылі Тэныд,] медым ме быд лун ошки Тэнсьыд дзирдлунтӧ.

⁹ Эн ӧтдорт менӧ пӧрысь кадӧ, эн эновт менӧ, кор менам вынӧй бырас.

¹⁰ Менӧ мустӧмтысьяс шуалӧны меным паныд, менсьым олӧмӧс босьтны кӧсйысьяс сёрнитӧны ас костаныс:

¹¹ «Енмыс эновтӧма сійӧс. Вӧтчӧй сы бӧрся да кутӧй сійӧс, ӧд сійӧс мездысьыс абу».

¹² Енмӧй, эн ылыстчы меысь! Енмӧй, тэрмась отсавны меным!

¹³ Менӧ мустӧмтысьяс мед яналасны да бырасны, меным лёксӧ вӧчны кӧсйысьяслы мед лоӧ юръяндзим.

¹⁴ А ме век понда [Тэ вылӧ] лача кутны, понда ёнджыка на ошкыны Тэнӧ.

¹⁵ Менам вомӧй пондас юӧртны Тэнсьыд веськыдлунтӧ, быд лун ме кута висьтавлыны Тэнад бур уджъясыд йылысь, ӧд налӧн лыдыс помтӧм-дортӧм.

¹⁶ Кута мӧвпавны Тэнад вына уджъяс йылысь, Господьӧй Ыджыдӧй, кута казьтывны Тэнсьыд веськыдлунтӧ, сӧмын Тэнсьыд.

¹⁷ Енмӧй, том кадсянь Тэ туйдӧдлін менӧ. Ме ӧнӧдз висьтавла Тэнад шензьӧдана уджъясыд йылысь.

¹⁸ Енмӧй, эн коль менӧ, кор ме пӧрысьма да дзорма. Ме кӧсъя висьтавны водзӧ чужысьяслы Тэнад ыджыд выныд йылысь.

¹⁹ Енмӧй, Тэнад веськыдлуныд енэжсьыс на вылынджык, Тэ вӧчин ыджыд уджъяс. Енмӧй, кодӧс позяс ӧткодявны Тэкӧд?

²⁰ Тэ мӧдӧдлін менам олӧмӧ уна шог да сьӧкыдлун, но сэсся бара ловзьӧдлін менӧ, му пыдӧссьыс лэптывлін менӧ.

²¹ Вылӧ кыпӧд менӧ, бурӧд менӧ! [Му пыдӧссьыс Тэ лэптывлін менӧ.]

²² Арфаӧн ворсӧмӧн кута ошкыны Тэнӧ, кута ошкыны Тэнсьыд збыльтӧ, Енмӧй, понда ворсны Тэныд гуслиӧн, Израильлӧн вежа Енмӧй!

²³ Менам вомӧй нимкодясьӧмӧн сьылӧ Тэныд, менам лолӧй тырӧма гажлунӧн, ӧд Тэ мездін менӧ.

²⁴ Дугдывтӧг кута висьтавлыны Тэнад веськыдлуныд йылысь, ӧд Тэ янӧдін да серамтуйӧ пуктін менӧ дзескӧдысьясӧс.