Псалтыр 7 - Коми Библия 2023

7 Псалом

¹ Господьлы Давидлӧн бӧрдана сьыланкыв Куш йылысь, коді вӧлі Венямин чужанкотырысь.

² Господьӧй Енмӧй, Тэ вылӧ ме лача кута. Мезды менӧ дзескӧдысьясысь да дорйы менӧ,

³ медым лев моз найӧ эз косявлыны менӧ, эз босьтны менсьым олӧмӧс, кор оз ло дорйысьыс [да мездысьыс].

⁴ Господьӧй Енмӧй, вӧчлі-ӧ ме мыйкӧ лёксӧ аслам киӧн,

⁵ мынтысьлі-ӧ ме лёкӧн сылы, коді оліс мекӧд лӧня? Ме ӧд мездывлі весиг сійӧс, коді нинӧм абусьыс менӧ мустӧмтліс.

⁶ Ме кӧ мыжми, дзескӧдысь мед вӧтӧдас менӧ, мед суӧдас да талялас менсьым олӧмӧс няйтӧ, мед бус йыв кыпӧдас менсьым нималӧмӧс.

⁷ Господьӧй, кыпӧдчы Аслад скӧрлунӧн, дорйы менӧ мустӧмтысьяслӧн лёкалӧмысь. Чеччы, Господьӧй, лок меным отсӧг вылӧ, ӧд веськыда мыждӧмыс – Тэнад киын.

⁸ Войтыръяс чукӧртчасны Тэ гӧгӧр, а Тэ пуксьы выліинӧ юралан пуклӧсад.

⁹ Господь мыждӧ войтыръясӧс. Мыжды менӧ, Господьӧй, менам веськыдлун да мыжтӧмлун серти.

¹⁰ Веськыд Енмӧй, лёк вӧчысьяслӧн скӧралӧмлы Тэ пукты пом, а веськыда олысьӧс ёнмӧд, ӧд Тэ пыдӧдз тӧдмалан мортлысь сьӧлӧмсӧ да пытшкӧсса мӧвпъяссӧ.

¹¹ Енмыс – менам сайӧдыс, Сійӧ мездӧ веськыд сьӧлӧмаясӧс.

¹² Енмыс – веськыда Мыждысь, [вына да терпитысь Ен,] Сійӧ быд лун чорыда мыждӧ мортӧс,

¹³ коді оз бергӧдчы Сы дінӧ. Енмыс лэчтӧ Ассьыс шыпуртсӧ, зэвтӧ Ассьыс ньӧввужсӧ да веськӧдӧ сылань.

¹⁴ Енмыс сылы паныд дасьтӧ вианторъяс, лӧсьӧдӧ биа ньӧвъяс.

¹⁵ Ентӧг олысь нӧбасьӧ лёк мӧвпъясӧн, новлӧдлӧ ас пытшкас лёксӧ да чужтӧ ылӧгсӧ.

¹⁶ Сійӧ кодйӧ гу, но ачыс сэтчӧ усьӧ.

¹⁷ Сылӧн лёк вӧчӧмыс бергӧдчас ас вылас, сылӧн виалӧм-дзескӧдӧмыс усяс сылы юр вылас.

¹⁸ Ошка Господьӧс Сылӧн веськыдлунысь, сьыла ошкӧм Медвылысса Господьлӧн нимыслы.