Псалтыр 67 - Коми Библия 2023

67 Псалом

¹ Сьылысьясӧн веськӧдлысьлы. Давидлӧн псалом. Сьыланкыв.

² Енмӧй, кыпӧдчы! Тэныд паныд сувтысьяс мед разаласны, Тэнӧ мустӧмтысьяс мед пышъясны Тэнад син водзысь!

³ Разӧд найӧс тшын моз! Кыдзи сись сылӧ ӧзъялігас, сідзи лёк вӧчысьяс бырасны Ен водзысь.

⁴ А веськыда олысьяс кутасны гажӧдчыны, кутасны долыда нимкодясьны Ен водзын.

⁵ Сьылӧй Енлы, сьылӧмӧн ошкӧй Сылысь нимсӧ, ыдждӧдлӧй Сійӧс, коді енэжъясын ветлӧдлӧ. Сылӧн нимыс – Господь. Нимкодясьӧй Сылӧн чужӧмбан водзын!

⁶ Енмыс олӧ Аслас вежа оланінын. Батьтӧмлы Сійӧ – Бать, дӧвалы Сійӧ – Дорйысь.

⁷ Ӧткаяслы Енмыс сетӧ оланін да котыр, дорӧмаясӧс мездӧ дзескыдінысь, но кывзысьтӧмъяс кутасны овны косьмӧм му вылын.

⁸ Енмӧй, кор Тэ мунін Аслад войтырыд водзын, кор Тэ восьлалін овтӧминӧд,

⁹ сэки муыс вӧрис, енэжсянь киссис зэр. Синай керӧс вӧрис Тэнад чужӧмбанысь, Израиль Енлӧн чужӧмбанысь.

¹⁰ Енмӧй, Тэ уна зэр кисьтлін, ёнмӧдлін вынтӧм мутӧ.

¹¹ Енмӧй, Тэнад войтырыд оліс сэні, Аслад бурлуныд кузя Тэ тӧждысин гӧльяс вӧсна.

¹² Господь шуӧ кыв, и аньяс ыджыд чукӧрӧн вермӧм йылысь юӧр вайӧны.

¹³ Пышйӧны ӧксыяс тышкайӧзыскӧд, пышйӧны, а тышын шедӧдӧмасӧ аньяс юклӧны гортаныс.

¹⁴ Ті куйланныд асланыд оланінын, лоинныд гулю кодьӧсь, сэтшӧм гулю, кодлӧн бордйыс вевттьысьӧма эзысьӧн, гӧныс – сӧстӧм зарниӧн.

¹⁵ Кор Ставсӧвермысь разӧдіс ӧксыясӧс, сэки муыс едждіс, лои Цалмон керӧсвывса лым кодь.

¹⁶ Васан керӧс – Енлӧн керӧс, Васан керӧс – джуджыд керӧс.

¹⁷ Джуджыд керӧсъяс, мыйла ті вежаланныд сійӧ керӧсыс вылӧ, кодӧс Енмыс бӧрйис Аслыс оланін пыдди? Господь кутас овны сэні помтӧг.

¹⁸ Енлӧн тышкасян тарантасыс лыдтӧм-тшӧттӧм, сюрсъясӧн да сюрсъясӧн. На пӧвстын Господь Аслас вежаинын, Синай керӧсын.

¹⁹ Господьӧй, Тэ кыпӧдчин вылісьыс-вылӧ, босьтін Аскӧдыд дорӧмаясӧс, Тэ сибӧдін йӧзӧс козин пыдди. Весиг паныд кыпӧдчысьяслы ковмас овны Господь Ен дінын.

²⁰ Господьлы ошкӧмыс лунысь-лун! Миянӧс мездысь Ен нуӧ миянлысь сьӧкыд нопнымӧс.

²¹ Миян Енным – мездысь Ен. Господь Ыджыдыс мездӧ миянӧс кулӧмысь.

²² Енмыс жугӧдас Сійӧс мустӧмтысьяслысь юрсӧ, поткӧдас мыжӧ вӧйӧмаяслысь юр пыдӧссӧ.

²³ Господь шуис: «Ме вайӧда найӧс Васансянь, лэпта найӧс саридз пыдӧсысь.

²⁴ Сэки тэ мыськалан ассьыд коктӧ налӧн вирӧн, тэнад понъясыд кутасны лакны налысь вирсӧ».

²⁵ Енмӧй, Тэнад войтырыд аддзӧ крамӧ мунӧм, менсьым Енмӧс да Ӧксыӧс ошкысьяслысь восьлалӧмсӧ.

²⁶ Водзвылас мунӧны сьылысьяс, бӧрвылас – мылаа ворсысьяс, а шӧракостас мунӧны нывъяс тимпанъяс вылын ворсӧмӧн.

²⁷ Найӧ сьылӧны: «Ошкӧй Господьӧс Ен войтырлӧн чукӧртчӧмын! Ошкӧй Енмӧс, Израиль войтыр!»

²⁸ Сэні мунӧ Венямин чужанкотыр, сійӧ чужанкотыръяс пӧвстысь медічӧт, но ыджыдалӧ, сэні мунӧны Иуда чужанкотырлӧн юралысьяс асланыс йӧзкӧд, тшӧтш Завулон да Неффалим чужанкотыръяслӧн юралысьяс.

²⁹ Миян Енным сетіс миянлы вын. Енмӧй, водзӧ на ёнмӧд миянӧс!

³⁰ Ерусалимса крамтӧ нимӧдӧм могысь ӧксыяс ваясны Тэныд козинъяс.

³¹ Енмӧй, чирышт эжӧр пӧвстын олысь зверӧс, войтыръяс вылын ыджыдалысь ӧшъясӧс, кодъяс ошйысьӧны асланыс эзысьӧн. Разӧд войтыръясӧс, кодъяс зэвтчӧны тышкасьны.

³² Ӧксылӧн йӧзыс локтасны Египетысь, эфиопияса войтыр нюжӧдас кисӧ Енлань.

³³ Мувывса войтыръяс, сьылӧй Енлы, сьылӧмӧн ошкӧй Господьӧс!

³⁴ Сійӧ ветлӧдлӧ нэмӧвӧйся енэжъясын, Сійӧ шыасьӧ, сетӧ вына шы.

³⁵ Кыпӧдӧй ошкӧм Енлы! Сылӧн дзирдлуныс вевттьӧ Израиль войтырӧс, Сылӧн выныс кымӧръясӧдз.

³⁶ Енмӧй, Тэ повзьӧдана Аслад вежаинын. Тэ – Израильлӧн Ен, Тэ сетан Аслад войтырыдлы вын да зумыдлун. Ошкӧм Енлы! Ошкӧм.