Псалтыр 65 - Коми Библия 2023

65 Псалом

1 Сьылысьясӧн веськӧдлысьлы. Сьыланкыв. Псалом.

¹ Сьылысьясӧн веськӧдлысьлы. Сьыланкыв. Псалом. Гораа нимкодясьӧмӧн ошкӧй Енсӧ, му вылын олысьяс!

² Сьылӧмӧн ошкӧй Сылысь нимсӧ, кыпӧдӧй Сылы ошкӧмсӧ да нимӧдӧмсӧ.

³ Шуӧй Енмыслы: «Тэнад уджъясыд повзьӧдланаӧсь! Тэнад кипод улӧ сетчасны Тэныд паныд сувтысьяс, ӧд Тэнад выныд вывті ыджыд.

⁴ Му вылын став олысьыс мед копыртчас Тэ водзӧ, мед сьылас Тэныд, [Медвылыссаӧй,] мед сьылӧмӧн ошкас Тэнсьыд нимтӧ!»

⁵ Локтӧй да видзӧдлӧй Енлӧн уджъяс вылӧ, наысь йӧзӧс полӧм босьтас.

⁶ Саридзсӧ Сійӧ вӧчис кос муӧн, войтырыс подӧн вуджис саридз вомӧн, та вӧсна ми нимкодясям Сыӧн.

⁷ Аслас вынӧн Сійӧ ыджыдалӧ помтӧг, Сылӧн синмыс видзӧдӧ войтыръяс бӧрся, медым найӧ эз кыпӧдчыны Сылы паныд.

⁸ Войтыръяс, ошкӧй миянлысь Еннымӧс, гораа кыпӧдӧй Сылы ошкӧмсӧ!

⁹ Сійӧ видзӧ миянлысь олӧмнымӧс, оз сет лигышмунны миян кокъяслы.

¹⁰ Енмӧй, Тэ тӧдмалін миянӧс, эзысьӧс моз сывдӧмӧн весалін миянӧс.

¹¹ Тэ лэдзин гартыштны миянӧс тывйӧн, дорны миянӧс чепъясӧн.

¹² Тэ лэдзин вӧрӧглы мунны миян вывті. Ми веськалім биӧ и ваӧ, но Тэ мездін миянӧс.

¹³ Ме вая Тэнад керкаӧ сотан вись, вая Тэныд кыв сетан вись,

¹⁴ мый ме кӧсйыси аслам вомӧн, сьӧкыдалігӧн висьталі аслам кывйӧн.

¹⁵ Ме вая Тэныд сотан висьяс, тшынӧда Тэ водзын тшӧгӧдӧм межъясӧс, вая Тэныд вись пыдди ӧшъясӧс да ай кӧзаясӧс.

¹⁶ Енсьыс полысьяс, локтӧй да кывзӧй, ме висьтала тіянлы ставсӧ, мый Сійӧ вӧчис менам олӧмын.

¹⁷ Аслам вомӧн ме шыаси Сы дінӧ, аслам кывйӧн ме ошки Сійӧс.

¹⁸ Менам сьӧлӧмын кӧ вӧлі мыж, Господь эськӧ эз кывзы менӧ.

¹⁹ Но Енмыс кывзіс менӧ, Сійӧ кыліс менсьым кевмысьӧмӧс.

²⁰ Ошкӧм Енлы! Сійӧ сибӧдіс менсьым кевмӧмӧс, эз вешты ме дінысь Ассьыс буралӧмсӧ.