Псалтыр 64 - Коми Библия 2023

64 Псалом

¹ Сьылысьясӧн веськӧдлысьлы. Давидлӧн псалом. Сьыланкыв.

² Енмӧй, Тэнӧ ошкӧны Сионын, вайӧны Тэныд кыв сетан висьяс [Ерусалимын].

³ Тэ кылан кевмысьӧм, та вӧсна став йӧзыс локтӧны Тэ дінӧ.

⁴ Лёк уджъясӧй личкӧны менӧ, но Тэ вештан миянлысь мыжнымӧс.

⁵ Шуда сійӧ, кодӧс Тэ бӧрйин да матыстін Ас дінад, медым сійӧ оліс Тэнад крамын. Пӧткӧд миянӧс Аслад вежа крамлӧн бурлуннас.

⁶ Енмӧй, миян Мездысьӧй, вочавидз миянлы! Тэ повзьӧдана, веськыда мыждан, Тэ вылӧ лача кутӧны мувывса став йӧзыс, весиг ылі саридз дорын олысьяс.

⁷ Аслад вынӧн Тэ сувтӧдін керӧсъяс, Тэ вӧнясьӧмыд ыджыд вынӧн.

⁸ Тэ лӧньӧдан саридзлысь ызгӧмсӧ, гыяслысь бузгӧмсӧ да йӧзыслысь шызьӧмсӧ.

⁹ Му пельӧсын олысьяс повзясны Тэнад шензьӧданаторъясысь, асылын и рытын кутасны кыпӧдны Тэныд ошкӧмсӧ.

¹⁰ Тэ тӧждысян муыс вӧсна, юктӧдан сійӧс ваӧн, сетан сылы озыр быдтас. Енмӧй, Тэнад юыд тырӧма ваӧн. Йӧзыслы Тэ быдтан нянь, ӧд та могысь Тэ лӧсьӧдін мусӧ.

¹¹ Гӧрӧм мусӧ Тэ юкталан ваӧн, чорыд шмакъяссӧ поткӧдлан, небзьӧдан мусӧ зэр войтъясӧн, бурсиан мулысь быдтассӧ.

¹² Юркытшӧн моз Тэ мичмӧдан вояс Аслад бур сетӧмторнад. Кытчӧ Тэ воськовтан, сэні муыс тырӧ пуктас-быдтасӧн,

¹³ овтӧминса йирсянінъяс вежӧдӧны, ыбъяс долыда нимкодясьӧны,

¹⁴ видзьяс тырӧны ыж чукӧръясӧн, ковтысъяс шептасьӧны няньӧн, сьылӧны да гораа нимкодясьӧны.