Псалтыр 62 - Коми Библия 2023

62 Псалом

¹ Давидлӧн псалом. Сійӧ лӧсьӧдіс тайӧс Иуда овтӧминын олігӧн.

² Енмӧй, Тэ менам Енмӧй. Водз асывсяньыс ме корся Тэнӧ, менам лолӧй гажтӧмтчӧ Тэысь, менам вир-яйӧй виччысьӧ Тэнӧ, нярмӧ куш да ватӧм овтӧминын.

³ Ме ёна кӧсъя аддзыны Тэнсьыд вынтӧ да дзирдлунтӧ, кыдзи водзын ме аддзывлі Тэнӧ вежаинын.

⁴ Ӧд Тэнад буралӧмыд олӧм дорысь на бурджык. Менам вомӧй ошкӧ Тэнӧ.

⁵ Кута ошкыны Тэнӧ, кытчӧдз ме ловъя, Тэ дінӧ шыасьӧмӧн кыпӧда ассьым киӧс.

⁶ Менам сьӧлӧмӧй бурмӧ чӧскыд да пӧтӧса сёянысь моз, менам вомӧй долыда ошкӧ Тэнӧ.

⁷ Вольпасьын ме казьтывла Тэнӧ, войся кадӧ мӧвпала Тэ йылысь.

⁸ Ӧд Тэ – меным отсӧг сетысьыс, Тэнад бордъяс улын ме кута долыда нимкодясьны.

⁹ Тэкӧд йитчӧма менам сьӧлӧмӧй, Тэнад веськыд киыд кутӧ менӧ.

¹⁰ Найӧс, кодъяс кӧсйӧны босьтны менсьым олӧмӧс, лоӧ шыбитӧма пыдӧстӧм гуӧ.

¹¹ Найӧс лоӧ виӧма шыпуртӧн, налӧн шойясӧн кутасны пӧткӧдчыны шакалъяс.

¹² Но ӧксы кутас нимкодясьны Енмӧн. Ен водзын кыв сетысь кутас ошкыны Енмӧс, а пӧръясьысьяслысь вомсӧ лоӧ тупкӧма.