Псалтыр 61 - Коми Библия 2023

61 Псалом

¹ Едутунлы, сьылысьяслӧн веськӧдлысьлы. Давидлӧн псалом.

² Сӧмын Енмыс сетӧ менам ловлы лӧньлунсӧ, Сысянь воӧ меным мездмӧмыс.

³ Сӧмын Сійӧ – менам изкыртаыс, менӧ Мездысьыс да Дорйысьыс, ме ог вӧрзьы.

⁴ Дыр-ӧ ті понданныд дзескӧдны менӧ? Ті ставныд усянныд пӧлыньтчӧм стен моз, нёровтчӧм потшӧс моз.

⁵ Ті мӧвпаланныд шыбитны менӧ вылісянь, сьӧлӧмнытӧ бурмӧданныд пӧръясьӧмӧн. Вомнаныд ті бурсианныд, но ас пытшканыд ёранныд.

⁶ Сӧмын Енмыс сетӧ менам ловлы лӧньлунсӧ, Сы вылӧ ме лача кута.

⁷ Сӧмын Сійӧ – менам изкыртаыс, менӧ Мездысьыс да Дорйысьыс, ме ог вӧрзьы.

⁸ Енмыс – менӧ Мездысьыс, Сыӧн ме ошйыся. Енмыс – менам изкыртаыс, Сы вылӧ ме лача кута.

⁹ Войтырӧй, Сы вылӧ лача кутӧй быд кадӧ, восьтӧй Сылы ассьыныд сьӧлӧмнытӧ. Енмыс – миянлы сайӧдчаніныс.

¹⁰ Мортлӧн пияныс – тӧвру пӧльыштӧм кодьӧсь, войтырлӧн пияныс – ылӧг, найӧс кӧ ставнысӧ ӧтлаын пуктыны вески вылӧ, найӧ лоӧны нинӧм абусьыс на кокньыдджыкӧсь.

¹¹ Энӧ лача кутӧй мырддялӧм эмбур вылӧ, энӧ ошйысьӧй гусявлӧмторнаныд. Кор тіян озырлунныд содас, тіян сьӧлӧмныд мед оз ляскысь сы дінӧ.

¹² Ӧтчыдысь Енмыс шуис, ме кыкысь кывлі, мый выныс – Енмыслӧн.

¹³ Господьӧй, буралӧмыс Тэнад, Тэ быдӧнлы мынтысян сылӧн уджъясыс серти.