Псалтыр 6 - Коми Библия 2023

6 Псалом

¹ Сьылысьясӧн веськӧдлысьлы. Ворсӧны кӧкъямыс струнаа ворсанторйӧн. Давидлӧн псалом.

² Господьӧй, эн янӧд менӧ лӧгалігад, эн мыжды менӧ скӧралігад.

³ Господьӧй, ло бур сьӧлӧма ме дінӧ, ӧд ме жеб. Бурдӧд менӧ, ӧд став лыӧй менам юкалӧ.

⁴ Менам лолӧй дзикӧдз нюкыртчӧма. Господьӧй, дыр-ӧ на меным виччысьнысӧ?

⁵ Господьӧй, бергӧдчы мелань, видз менсьым лолӧс! Мезды менӧ, ӧд Тэ бур сьӧлӧма!

⁶ Кулӧм мортыд оз нин казьтыв Тэнӧ, гуын куйлысь оз нин ошкы Тэнӧ.

⁷ Ме мудзи нин аслам ружтӧмысь, быд вой ме бӧрда аслам вольпасьын, кӧтӧда ассьым юрлӧсӧс синваӧн.

⁸ Шогӧйла менам синмӧй вӧйис, менӧ дзескӧдысьяс вӧсна синмӧй дзикӧдз жебмис.

⁹ Лёк вӧчысьяс, вешйӧй ме дінысь, ӧд Господь кылӧ менсьым бӧрдӧмӧс.

¹⁰ Сійӧ кылӧ менсьым корӧмӧс, Сійӧ вочавидзас менам кевмысьӧм вылӧ.

¹¹ Став менсьым вӧрӧгӧс лоӧ янӧдӧма, найӧс полӧм босьтас, найӧ бӧр бергӧдчасны да яналӧмӧн пышъясны. Ошкӧм.