Псалтыр 59 - Коми Библия 2023

59 Псалом

¹ Сьылысьясӧн веськӧдлысьлы. Сьылӧны ”Шушан эдут” шылад улӧ. Давид лӧсьӧдіс тайӧ кывбурсӧ велӧдӧм могысь,

² кор сійӧ тышкасис месопотамияса да цоваса арамейяскӧд, и кор тышысь бӧрсӧ локтігӧн Сола ковтысын Йоав бырӧдіс дас кык сюрс эдомса тышкамортӧс.

³ Енмӧй, Тэ дӧзмин миян вылӧ, Тэ эновтін да пасьвартін миянӧс. Бӧр бергӧдчы миянлань!

⁴ Тэ вӧрзьӧдін мусӧ да поткӧдін сійӧс. Бурдӧд сылысь дойяссӧ, ӧд сійӧ сыркакылӧ.

⁵ Тэ сетін нуны Аслад войтырлы уна сьӧкыдлун, Тэ юкталін миянӧс коддзӧдан винаӧн.

⁶ Тэысь полысьяслы Тэ сетін дӧрапас, медым найӧ кыпӧдісны сійӧс збыльыс вӧсна.

⁷ Мезды Ассьыд мусаястӧ, дорйы найӧс Аслад веськыд кинад, вочавидз меным!

⁸ Енмыс шуис Аслас вежаинсянь: «Нимкодьпырысь Ме юкла тіянлы Сикем му, муртала тіянлы Суккот ковтыс.

⁹ Галаад му – Менам, Манассей чужанкотырлӧн му – Менам, Ефрем му – Менам юртупкӧдӧй, Иуда му – Менам юралан беддьӧй,

¹⁰ Моав му – Менам мыссян дозйӧй, Эдом муӧ Ме шыбита Ассьым кӧмкотӧс. Филистим му, нимкодясьӧмӧн ошкы Менӧ!»

¹¹ Коді пыртас менӧ изкарӧ? Коді вайӧдас менӧ Эдом муӧдз?

¹² Он-ӧ Тэ, Енмӧй? Но Тэ, Енмӧй, эновтін миянӧс, миян тышкайӧзкӧд ӧтвыв эн пет тышӧ.

¹³ Отсав миянлы, ӧд миянӧс дзескӧдӧны, а йӧзсянь отсӧгсӧ виччысьны весьшӧрӧ.

¹⁴ Енмыскӧд ми вӧчам ыджыд уджъяс, миянӧс дзескӧдысьясӧс Сійӧ талялас.