Псалтыр 58 - Коми Библия 2023

58 Псалом

¹ Сьылысьясӧн веськӧдлысьлы. Сьылӧны ”Эн бырӧд” шылад улӧ. Давид лӧсьӧдіс тайӧ кывбурсӧ, кор Саул мӧдӧдіс Давидлӧн керка дорӧ кыйӧдчысьясӧс, медым вины сійӧс.

² Енмӧй, мезды менӧ мустӧмтысьясысь, дорйы менӧ паныд кыпӧдчысьясысь,

³ мезды менӧ лёк вӧчысьясысь, видз менӧ вир кисьтысьясысь,

⁴ ӧд найӧ кыйӧдӧны босьтны менсьым олӧмӧс. Господьӧй, ме лёктор да мыж эг вӧч, но вынаяс усьласьӧны ме вылӧ.

⁵ Ме абу мыжа, но найӧ дасьӧсь уськӧдчыны ме вылӧ. Господьӧй, видзӧдлы да лок меным отсӧг вылӧ!

⁶ Господьӧй, Ен Саваоф, Тэ Израильлӧн Ен, кыпӧдчы мыждыны войтыръясӧс, эн жалит лёк вӧчысьясӧс.

⁷ Рытнас найӧ локтӧны, омлялӧны понъяс моз, шӧйтӧны кар гӧгӧрыс.

⁸ Налӧн вомысь петӧ лёкӧдӧм, налӧн кывйыс шыпурт кодь. Найӧ чайтӧны, мый найӧс некод оз кыв.

⁹ Но Тэ, Господьӧй, сералан лёк вӧчысьяс вылын, Тэ янӧдан войтыръясӧс.

¹⁰ Енмӧй, Тэ – менам выныс! Ме виччыся Тэнӧ, ӧд Тэ – менӧ Дорйысьыс.

¹¹ Менам Енмӧй бур сьӧлӧма ме дінӧ, Сійӧ нуӧдӧ менӧ. Енмыс сетас меным аддзыны, мый лоас менӧ мустӧмтысьяскӧд.

¹² Господьӧй, эн бырӧд найӧс, медым менам войтырӧй эз вунӧд Тэнсьыд уджъястӧ. Тэ – миян сайӧдыс, Аслад вынӧн разӧд найӧс да уськӧд кок йывсьыныс.

¹³ Асланыс сёрниӧн найӧ мыжмӧны. Мед найӧ шедасны налькйӧ асланыс ышнясьӧмысь, пӧръясьӧмысь да ёрӧмысь.

¹⁴ Аслад скӧрлунӧн бырӧд найӧс, бырӧд, мед найӧ дзикӧдз бырасны. Сэки йӧзыс тӧдмаласны, мый Енмыс ыджыдалӧ Яковлӧн рӧд вылын да став му пасьтала.

¹⁵ Рытнас найӧ локтӧны, омлялӧны понъяс моз, шӧйтӧны кар гӧгӧрыс,

¹⁶ шӧйтӧны да корсьӧны кынӧмпӧт, но войсӧ тшыгйӧн коллялӧны.

¹⁷ А ме кута сьывны Тэнад выныд йылысь, водз асывсянь ошкыны Тэнсьыд буралӧмтӧ, ӧд менам сьӧкыдалігӧн Тэ вӧлін меным сайӧдчанінӧн да дзебсянінӧн.

¹⁸ Тэ – менам выныс! Кута сьывны Тэныд, ӧд Тэ, Енмӧй, менӧ Дорйысьыс, Тэ – ме дінӧ буралысь Ен.