Псалтыр 57 - Коми Библия 2023

57 Псалом

¹ Сьылысьясӧн веськӧдлысьлы. Сьылӧны ”Эн бырӧд” шылад улӧ. Давидлӧн кывбур.

² Мыждысьяс, збыльсӧ-ӧ ті висьталанныд? Мортлӧн пиян, веськыда-ӧ ті мыжданныд?

³ Сьӧлӧманыд ті лёксӧ вӧчанныд, асланыд киӧн виаланныд-дзескӧданныд.

⁴ Лёк вӧчысьяс чужӧмсяньныс вошӧмаӧсь, пӧръясьысьяс мам кынӧмсяньныс ылалӧмаӧсь.

⁵ Налӧн ядыс – змей яд кодь, найӧ тупкӧмаӧсь пельнысӧ, найӧ пельтӧм змей кодьӧсь.

⁶ Пельтӧм змей оз кыв нимкыв лыддьысьлысь гӧлӧс шысӧ, кимӧститчысьлысь мича кывъяссӧ.

⁷ Енмӧй, чегъяв налӧн вомысь пиньяссӧ, Господьӧй, жуглы тайӧ левъяслысь черлыяссӧ!

⁸ Найӧ мед бырасны визувтысь ва моз, ньӧввужнысӧ зэвттӧдз мед куласны.

⁹ Найӧ мед косьмасны мыччысьысь лёльӧ моз, мед оз аддзыны шондісӧ чӧвтчӧм кага шой моз.

¹⁰ Найӧ бипурвывса увъяс кодьӧсь, ӧтияс дзоньӧсь на, мӧдъяс сотчӧны нин. Пуан пӧртйӧ биыслӧн инмытӧдз на тӧвнырыс разӧдас найӧс.

¹¹ Веськыда олысь кутас нимкодясьны, кор аддзас водзӧс перйӧмсӧ, сійӧ мыськалас ассьыс коксӧ лёк вӧчысьяслӧн вирӧн.

¹² Сэки йӧзыс шуасны: «Веськыда олысьлы вичмас тырдон. Збыльысь эм Ен, коді веськыда мыждӧ му вылын». Ошкӧм.