Псалтыр 56 - Коми Библия 2023

56 Псалом

¹ Сьылысьясӧн веськӧдлысьлы. Сьылӧны ”Эн бырӧд” шылад улӧ. Давид лӧсьӧдіс тайӧ кывбурсӧ, кор пышйис Саулысь изкыртаӧ.

² Енмӧй, ло бур сьӧлӧма ме дінӧ, бурсьӧлӧмтчы, ӧд Тэ вылӧ ме лача кута. Ме сайӧдча Тэнад бордъяс улӧ, кытчӧдз шогыс оз помась.

³ Ме шыася Медвылысса Ен дінӧ, меным бурсӧ вӧчысь Ен дінӧ.

⁴ Сійӧ мӧдӧдас меным отсӧгсӧ енэжсянь да мездас менӧ, янӧдас найӧс, кодъяс кӧсйӧны бырӧдны менӧ. Енмыс восьтас меным Ассьыс буралӧмсӧ да збыльсӧ.

⁵ Ме ола левъяс пӧвстын, биӧн лолалысь зверъяс пӧвстын, сэтшӧм йӧз пӧвстын, кодъяслӧн пиньныс шы да ньӧв кодь, кодъяслӧн кывйыс ёсь шыпурт кодь.

⁶ Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала!

⁷ Менам коклы нальк пуктісны, менам лолӧй дзикӧдз нюкыртчис. Найӧ кодйисны меным гу, но асьныс сэтчӧ усисны.

⁸ Енмӧй, менам сьӧлӧмӧй дась нин, менам сьӧлӧмӧй дась сьывны да ошкыны Тэнӧ.

⁹ Садьмы, менам лолӧй, садьмӧй, арфа да гусли! Ме садьмӧда асъя кыасӧ.

¹⁰ Господьӧй, ме ошка Тэнӧ войтыръяс пӧвстын, сьыла Тэныд чужанкотыръяс пӧвстын,

¹¹ ӧд Тэнад буралӧмыд енэжъясысь вылынджык, Тэнад збыльыд кымӧръясысь вылынджык.

¹² Енмӧй, Тэнӧ нимӧдӧмыс мед кыптас енэжъясысь на вылӧджык, Тэнад дзирдлуныд мед паськалас став му пасьтала!