Псалтыр 55 - Коми Библия 2023

55 Псалом

¹ Сьылысьясӧн веськӧдлысьлы. Сьылӧны ”Ылі муын чӧв олысь гулю” шылад улӧ. Давид лӧсьӧдіс тайӧ кывбурсӧ, кор филистимсаяс кутісны сійӧс Гефын.

² Енмӧй, ло бур сьӧлӧма ме дінӧ, ӧд йӧзыс кӧсйӧны бырӧдны менӧ, быд лун усьласьӧны ме вылӧ да дзескӧдӧны менӧ.

³ Мустӧмтысьяс быд лун кӧсйӧны бырӧдны менӧ. Медвылыссаӧй, ме вылӧ усьласьысьыс вывті уна!

⁴ Кор ме пола, Тэ вылӧ лача кута.

⁵ Ме ошка Енмӧс Сылӧн кывйысь, Ен вылӧ лача кута, нинӧмысь ог пов. Мый вӧчас меным мортыс?

⁶ Мустӧмтысьяс быд лун мӧдарӧ бергӧдӧны менсьым кывъясӧс, мӧвпалӧны меным лёксӧ вӧчны.

⁷ Найӧ гусьӧн чукӧртчӧны да кыйӧдчӧны ме бӧрся, медым босьтны менсьым олӧмӧс.

⁸ Енмӧй, найӧ мед оз пышйыны водзӧс перйӧмсьыд! Аслад скӧрлунӧн улӧ лэдз войтыръясӧс.

⁹ Тэнад лыддьӧма став менсьым пышъялан лунӧс. Чукӧрт Аслад дозъяд менсьым синваӧс, гиж найӧс Аслад небӧгад.

¹⁰ Кор ме шыася Тэ дінӧ, мустӧмтысьяс бӧр пышйӧны. Та серти тӧдмала, мый Енмыс ме дор.

¹¹ Ме ошка Енмӧс Сылӧн кывйысь, ошка Господьӧс Сылӧн шуӧмысь.

¹² Ен вылӧ лача кута, нинӧмысь ог пов. Мый вӧчас меным мортыс?

¹³ Енмӧй, ме сеті Тэныд кыв и куті сійӧс, ӧні ме вая Тэныд аттьӧалана вись.

¹⁴ Ӧд Тэ мездін менӧ кулӧмысь, [чышкин менсьым синваӧс,] видзин менсьым кокӧс крукасьӧмысь. Ме ветла Енлӧн чужӧмбан водзын олӧмыслӧн югыдас.