Псалтыр 54 - Коми Библия 2023

54 Псалом

¹ Сьылысьясӧн веськӧдлысьлы. Ворсӧны струнаа ворсанторйӧн. Давидлӧн сьыланкыв.

² Енмӧй, кыв менсьым кевмысьӧмӧс, эн ӧтдорт менсьым кевмӧмӧс.

³ Кывзы менӧ да вочавидз меным. Ыджыд шогӧйла ме ойза, ёна майшася

⁴ мустӧмтысьяслӧн гӧлӧс шыысь, лёк вӧчысьяслӧн дзескӧдӧмысь, ӧд найӧ вайӧны меным уна сьӧкыдлун, ыджыд скӧрлунӧн мыжалӧны менӧ.

⁵ Менам сьӧлӧмӧй тіралӧ, менӧ топӧдӧ кулана полӧм.

⁶ Менӧ дзӧрӧдӧ полӧмӧйла, менӧ шымыртіс ыджыд полӧм.

⁷ Ме шуи: «Вӧліны кӧ менам гулюлӧн кодь бордъяс, ме эськӧ лэбзи да лӧни,

⁸ ме эськӧ ылӧдз лэбзи, кольччи овтӧминӧ,

⁹ тэрмаси эськӧ сайӧдчыны, дзебси тӧвнырысь да бушколысь».

¹⁰ Господьӧй, шӧйӧвошт найӧс, торк налысь сёрнисӧ, ӧд тайӧ карас ме аддза виалӧм-дзескӧдӧм да лёксьӧм.

¹¹ Лун и вой найӧ ветлӧдлӧны карті, кыйӧдчӧны карса стенъяс вылын. Карыс тырӧма лёк вӧчӧмӧн да шогӧн,

¹² карас ыджыдалӧ лэдзчысьӧм олӧм, сылӧн туйяс вылысь оз бырлыны нартитӧм да пӧръясьӧм.

¹³ Паныд сувтысь кӧ лёкӧдіс менӧ, тайӧс эськӧ ме верми нунысӧ. Мустӧмтысь кӧ дзескӧдіс менӧ, сыысь эськӧ ме дзебси.

¹⁴ Но тадзи вӧчан тэ, ме кодь жӧ морт, менам матысса ёртӧй,

¹⁵ кодкӧд ме сёрнитлі восьса сьӧлӧмӧн, кодкӧд ӧтвыв ми ветлывлім Енлӧн керкаӧ.

¹⁶ Менӧ мустӧмтысьясӧс мед суас кулӧмыс, найӧ мед ловйӧн мунасны пыдӧстӧминӧ, ӧд налӧн оланінын да налӧн сьӧлӧмын ыджыдалӧ лёкыс.

¹⁷ Но ме шыася Господь Ен дінӧ, и Сійӧ мездас менӧ.

¹⁸ Рыт-асывсӧ и луншӧр кадӧ ме понда бӧрдӧмӧн кевмысьны, и Енмыс кылас менсьым гӧлӧс шыӧс.

¹⁹ Унаӧн сувтӧны меным паныд, но Енмыс мездас менӧ да сетас лӧньлун.

²⁰ Енмыс кылас менӧ, пыр Олысь ланьтӧдас найӧс, кодъяс Енсьыс оз повны, оз кӧсйыны вежсьыны бурланьӧ.

²¹ Найӧ лэптӧны кинысӧ накӧд лӧня олысьяс вылӧ, торкӧны ёртасян йитӧдсӧ.

²² Налӧн сёрниныс выйысь на небыдджык, но налӧн сьӧлӧмын – лёксьӧм, налӧн кывъясыс вый моз мавтыштӧны, но найӧ шыпурт кодь лэчыдӧсь.

²³ Вай ассьыд тӧжд-могтӧ Господьлы, и Сійӧ кутыштас тэнӧ, Сійӧ некор оз лэдз лигышмунны веськыда олысьлы.

²⁴ Енмӧй, Тэ шыбитан джуджыд гуӧ вир кисьтысьясӧс да ылӧдчысьясӧс, найӧ оз овны весиг ассьыныс джын нэмсӧ. А ме, [Господьӧй,] Тэ вылӧ лача кута. Ошкӧм.