Псалтыр 53 - Коми Библия 2023

53 Псалом

¹ Сьылысьясӧн веськӧдлысьлы. Ворсӧны струнаа ворсанторйӧн. Давидлӧн сьыланкыв.

² Давид лӧсьӧдіс тайӧ сьыланкывсӧ, кор Зиф карысь локтісны йӧз да висьталісны Сауллы, мый Давид дзебсясьӧ на пӧвстын.

³ Енмӧй, Аслад нимыд кузя мезды менӧ, Аслад вынӧн дорйы менӧ!

⁴ Енмӧй, кыв менсьым кевмӧмӧс, кывзы менсьым кывъясӧс!

⁵ Локтысь йӧз кыпӧдчисны меным паныд, лёк вӧчысьяс корсьӧны босьтны менсьым олӧмӧс, Енсӧ найӧ нинӧм туйӧ пуктӧны.

⁶ Енмыс – меным отсӧг сетысьыс, Господь ёнмӧдӧ менсьым лолӧс.

⁷ Сійӧ мынтысяс менӧ мустӧмтысьяслы налӧн лёк вӧчӧмысь. Господьӧй, Аслад кӧсйысьӧм серти бырӧд найӧс.

⁸ Господьӧй, ме сьӧлӧмсянь вая Тэныд вись, ошка Тэнсьыд нимтӧ, ӧд сійӧ бур.

⁹ Тэ мездан менӧ став шогысь, аслам синмӧн ме аддза менӧ мустӧмтысьясӧс бырӧдӧм.