Псалтыр 52 - Коми Библия 2023

52 Псалом

¹ Сьылысьясӧн веськӧдлысьлы. Сьылӧны ”Махалат” шылад улӧ. Давидлӧн сьыланкыв.

² Мывкыдтӧм морт мӧвпалӧ, мый Енмыс абу. Йӧзыс сетчисны лёкас, олӧны зывӧка, бур вӧчысьыс абу.

³ Енмыс енэжсяньыс видзӧдӧ йӧзыс вылӧ, медым аддзыны, эм-ӧ вежӧра мортыс, Енсӧ корсьысьыс.

⁴ Но ставныс кежӧмаӧсь, ӧтитӧг шогмытӧмӧсь, бур вӧчысьыс абу, весиг ӧтик абу.

⁵ Мыйла оз мывкыдсявны лёксӧ вӧчысьяс? Найӧ нянь моз сёйӧны менсьым войтырӧс, оз шыасьны Ен дінӧ.

⁶ Но найӧс полӧм босьтас, кор нинӧмысь лоӧ повнысӧ, ӧд Енмыс разӧдас вӧрӧглысь лыяссӧ. Найӧс лоӧ янӧдӧма, ӧд Енмыс эновтіс найӧс.

⁷ Сионысь мед воас Израильлы мездмӧмыс! Кор Енмыс бӧр бергӧдас Ассьыс войтырсӧ пленысь, сэки Яков кутас нимкодясьны, Израиль кутас гажӧдчыны.