Псалтыр 51 - Коми Библия 2023

51 Псалом

¹ Сьылысьясӧн веськӧдлысьлы. Давидлӧн сьыланкыв.

² Давид лӧсьӧдіс тайӧ сьыланкывсӧ сы бӧрти, кор эдомса Доик юӧртіс Сауллы Ахимелек ордӧ Давидлӧн локтӧм йылысь.

³ Вына мортӧй, мыйла ошйысян лёк вӧчӧмнад? Енлӧн буралӧмыс оз помасьлы!

⁴ Тэнад кывйыд сёрнитӧ бырӧдӧм йылысь, сійӧ бритва кодь лэчыд, тэ – ылӧдчысь!

⁵ Бурыс дорысь тэ ёнджыка радейтан лёксӧ, збыльыс дорысь ёнджыка радейтан ылӧгсӧ.

⁶ Тэ радейтан виана кывъяс, тэ ылӧдчысь вома морт!

⁷ Та вӧсна Енмыс дзикӧдз бырӧдас тэнӧ, босьтас да шыбитас тэнӧ аслад оланінсьыд, вужнас нетшыштас тэнӧ ловъя олысьяслӧн муысь.

⁸ Тайӧс аддзӧмысь веськыда олысьясӧс полӧм босьтас, найӧ кутасны серавны тэ вылын. Шуасны:

⁹ «Видзӧдлӧй, тайӧ мортыс эз Енсянь корсь дорйӧмсӧ, сійӧ лача кутіс аслас ыджыд озырлун вылӧ, ёнмӧдчис аслас лёк уджъясӧн».

¹⁰ А ме Енлӧн керкаын вежӧдысь олив пу кодь, лача кута Енлӧн буралӧмыс вылӧ нэмъяс чӧж.

¹¹ Енмӧй, кута помтӧг ошкыны Тэнӧ став уджсьыд. Тэнад эскана войтырыдкӧд понда лача кутны бур нимыд вылӧ.