Псалтыр 50 - Коми Библия 2023

50 Псалом

¹ Сьылысьясӧн веськӧдлысьлы. Давидлӧн псалом.

² Давидлӧн Вирсавиякӧд узьӧм бӧрас сы дінӧ воліс Нафан пророк.

³ Енмӧй, Аслад буралӧмыд кузя ло бур сьӧлӧма ме дінӧ, Аслад ыджыд бурлуныд кузя чышкышт менсьым мыжъясӧс.

⁴ Мыськы менӧ лёк вӧчӧмысь, весав менӧ, сӧстӧммӧд менӧ мыжысь.

⁵ Ӧд ме тӧда ассьым лёк вӧчӧмъясӧс, менам мыжӧй пыр син водзын.

⁶ Тэныд, сӧмын Тэныд паныд ме мыж вӧчи, Тэнад син водзын ме лёксӧ вӧчи. Тэ веськыда вӧчан, кор менӧ чирыштан, Тэ веськыда мыждан менӧ.

⁷ Бать кӧйдысын нин ме вӧлі мыж пытшкас, мам кынӧмсянь – мыжа морт.

⁸ Но Тэныд муса сьӧлӧмпытшса збыльыс, восьт меным Ассьыд мывкыдлунтӧ.

⁹ Рез менӧ иссоп турунӧн, и ме сӧстӧмма. Мыськы менӧ, и ме лоа лымйысь на еджыд.

¹⁰ Сет меным кывны нимкодь юӧр, мед нимкодясясны Тэӧн жугӧдӧм лыясӧй.

¹¹ Бергӧд Ассьыд чужӧмбантӧ менам мыжъясысь, чышкышт менсьым став лёк вӧчӧмӧс.

¹² Енмӧй, вӧч ме пытшкын сӧстӧм сьӧлӧм, выльмӧд да ёнмӧд менсьым лолӧс.

¹³ Эн вӧтлы менӧ Аслад чужӧмбан водзысь, Ассьыд Вежа Ловтӧ эн босьт ме пытшкысь.

¹⁴ Сет меным бара нимкодясьны мездмӧмысь, вына Ловнад ёнмӧд менӧ.

¹⁵ Лёк вӧчысьясӧс ме веськӧда Тэнад туй вылӧ, мыжаяс мед бергӧдчасны Тэ дінӧ.

¹⁶ Енмӧй, менӧ мездысь Енмӧй, вешты ме вылысь вир кисьтан мыжӧс, сэки менам вомӧй кутас ошкыны Тэнсьыд веськыда мыждӧмтӧ.

¹⁷ Господьӧй, восьт менсьым вомӧс, и менам вомысь кыптас Тэныд ошкӧмыс.

¹⁸ Ме эськӧ вайи Тэныд вись, но Тэ он кӧсйы сійӧс, сотан вись оз шогмы Тэныд.

¹⁹ Енлы медбур висьыс – доймӧм сьӧлӧм. Небзьӧм да рам сьӧлӧмаӧс Тэ он увтырт, Енмӧй.

²⁰ [Господьӧй,] Аслад бурлуныд кузя вӧч бурсӧ Сионлы, выльысь кыпӧд Ерусалимлысь стенъяссӧ!

²¹ Сэки Тэ сибӧдан сотан да мукӧд висьяс, мый колӧ вайны веськыдлун серти. Тэнад висьпуктанін вылын ваясны вись пыдди ӧшъясӧс. Ошкӧм.