Псалтыр 5 - Коми Библия 2023

5 Псалом

¹ Сьылысьясӧн веськӧдлысьлы. Ворсӧны пӧлянӧн. Давидлӧн псалом.

² Господьӧй, кыв менсьым кывъясӧс, гӧгӧрво менсьым мӧвпъясӧс.

³ Менам Енмӧй да Ӧксыӧй, кыв менсьым гораа бӧрдӧмӧс, ӧд ме кевмыся Тэныд.

⁴ Господьӧй, асывсяньыс кыв менсьым гӧлӧс шыӧс. Асывнас ме сувта Тэ водзӧ да кута виччысьны.

⁵ Тэ – лёксӧ мустӧмтысь Ен. Лёк вӧчысь оз овмӧдчы Тэ ордӧ,

⁶ вылӧ кыпӧдчысь оз ло Тэнад син водзын. Лёк вӧчысьӧс Тэ мустӧмтан,

⁷ ылӧдчысьӧс Тэ бырӧдан, вир кисьтысьӧс да наян мортӧс Тэ, Господьӧй, зывӧктан.

⁸ Но Тэнад ыджыд буралӧмыд вӧсна ме верма пырны Тэнад крамӧ, Тэысь полӧмӧн копыртчыны Тэнад вежаинлань.

⁹ Господьӧй, нуӧд менӧ Аслад веськыд туйӧд, шыльӧд сійӧс меным мустӧмтысьяслӧн син водзын.

¹⁰ Ӧд налӧн вомын збыльыс абу, налӧн сьӧлӧмын – бырӧдӧм, налӧн горшныс – восьса гу, кывнас найӧ пӧръясьӧны.

¹¹ Енмӧй, мыжды найӧс, налӧн лёк мӧвпъясыс мед бырӧдасны асьнысӧ. Шыбит найӧс уна лёк вӧчӧмныс вӧсна, ӧд найӧ кыпӧдчисны Тэныд паныд.

¹² Тэ вылӧ лача кутысьяс мед нимкодясясны, найӧ мед помтӧг гажӧдчасны. Тэ доръян найӧс, кодъяслы муса Тэнад нимыд, и найӧ кутасны ошйысьны Тэӧн.

¹³ Ӧд Тэ, Господьӧй, бурсиан веськыда олысьӧс, Тэнад бурлуныд сайӧд моз видзӧ найӧс.