Псалтыр 49 - Коми Библия 2023

49 Псалом

1 Асафлӧн псалом.

¹ Асафлӧн псалом. Енмыс, Господь Ен, сетіс Ассьыс гӧлӧс шысӧ, став му пасьталаысь асыввывсянь рытыввылӧдз Сійӧ чукӧстіс йӧзӧс.

² Сионсянь, тырвыйӧ мича карсянь, Ен петкӧдчӧ дзирдлуннас.

³ Миян Енным локтас, чӧв оз ов, Сы водзвылын лоӧ ставсӧ сотысь би, Сы гӧгӧр лоӧ ыджыд тӧвныр.

⁴ Сійӧ чуксалӧ енэжсӧ да мусӧ, медым мыждыны Ассьыс войтырсӧ.

⁵ Сійӧ шуӧ: «Чукӧртӧй Ме дінӧ Менсьым эскана войтырӧс, коді вись вайӧмӧн пырис Менам йитӧдӧ».

⁶ Енэжыс юӧртас Енлӧн веськыдлун йылысь, ӧд Сійӧ – веськыда мыждысь Ен.

⁷ – Кывзӧй, Менам войтырӧй, ӧні Ме кута сёрнитны. Израиль, Ме кута сёрнитны тэныд паныд. Ме – Ен, тэнад Енмыд.

⁸ Ме ог понды янӧдны тэнӧ вись вайӧм вӧсна, ӧд тэнад сотан висьыд пыр Менам син водзын.

⁹ Меным оз ковны тэнад вевт улысь ӧшъяс, оз ковны тэнад йӧрысь кӧзаяс,

¹⁰ ӧд вӧрса став звер-пӧткаыс Менам, сюрс керӧс вылын олысь став пемӧсыс тшӧтш Менам.

¹¹ Ме тӧда керӧсвывса став лэбачсӧ, видзвывса став пемӧсыс – Менам.

¹² Ме кӧ тшыгъялі, Ме эськӧ эг висьтав тэныд, ӧд муюгыдыс да ставыс, мый сэні эм – Менам.

¹³ Ме ӧмӧй сёя ӧш яй, Ме ӧмӧй юа кӧза вир?

¹⁴ Вай Енмыслы вись пыдди аттьӧалӧм, вӧч сійӧ, мый кӧсйысин Медвылыссалы.

¹⁵ Шыась Ме дінӧ сьӧкыд кадӧ, сэки Ме мезда тэнӧ, и тэ нимӧдан Менӧ.

¹⁶ Лёк вӧчысьлы Енмыс шуӧ: – Мыйла тэ висьтавлан Менам тшӧктӧмъяс йылысь, сёрнитан Менам йитӧд йылысь,

¹⁷ но мустӧмтан Менсьым велӧдӧмӧс, нинӧмӧ пуктан Менсьым кывъясӧс?

¹⁸ Аддзан кӧ гусясьысьӧс, ӧтвывтчан сыкӧд, волысян гозъякост олӧм пежалысьяскӧд.

¹⁹ Ассьыд вомтӧ восьтан лёк сёрни вылӧ, аслад кывйӧн гудрасян ылӧгас.

²⁰ Пукалан да удтысян аслад вокыд вылӧ, мамыдлӧн пиыс йылысь суклясян.

²¹ Тэ вӧчин тадзи, но Ме чӧв олі. Тэ чайтін, мый Ме тэ кодь жӧ. Но Ме янӧда тэнӧ, мыжала тэнӧ [мыжъяссьыд].

²² Енсӧ вунӧдысьяс, гӧгӧрвоӧй тайӧс, медым Ме эг бырӧд тіянӧс. Сэки некод оз мезды тіянӧс.

²³ Коді вайӧ Меным вись пыдди аттьӧалана кывъяс, сійӧ бурӧ пуктӧ Менӧ. Коді видзӧдӧ аслас олан туй бӧрся, сійӧ аддзас Менсьым мездӧмӧс.