Псалтыр 48 - Коми Библия 2023

48 Псалом

¹ Сьылысьясӧн веськӧдлысьлы. Корей пиянлӧн псалом.

² Кывзӧй, войтыръяс, сюся кывзӧй, му вылас олысьяс,

³ нималана йӧз и нимавтӧмъяс, озыръяс и гӧльяс.

⁴ Менам вомӧй висьталӧ мывкыд кывъяс, сьӧлӧмпытшса мӧвпъясӧй восьтӧны тӧдӧмлун.

⁵ Ме бергӧда пельӧс шусьӧгъяслань, гуслиӧн ворсігӧн ме висьтала нӧдкывъяс.

⁶ Мыйла меным повнысӧ сьӧкыд кадӧ, кор лёк ылӧдчысьяс кытшалӧны менӧ?

⁷ Найӧ лача кутӧны асланыс эмлуныс вылӧ, ошйысьӧны асланыс ыджыд озырлунӧн.

⁸ Мортыс нинӧм вылӧ оз вермы ньӧбны ассьыс воксӧ, нинӧмӧн оз вермы вештысьны Енмыслы сылӧн олӧмысь.

⁹ Морт олӧмыд ыджыд дон сулалӧ, он вермы мынтысьны,

¹⁰ медым сійӧ помтӧг оліс, медым сійӧс некор эз гуавны.

¹¹ Быдӧн тӧдӧ, мый мывкыдтӧмъяс да вежӧртӧмъяс моз весиг мывкыдаяс кулӧны, ассьыныс эмбурсӧ кольӧны мукӧдлы.

¹² Найӧ чайтӧны, мый налӧн керкаясыс пыр кутасны сулавны, налӧн оланінъясыс вуджасны на бӧрся чужысьяслы. Му пайнысӧ найӧ нимтӧны асланыс нимӧн,

¹³ но весиг нималана морт оз кут пыр овны, сійӧ пемӧс моз тшӧтш кулӧ.

¹⁴ Налӧн олан туйыс – мывкыдтӧмлун, и на бӧрся олысьяс дорйӧны налысь видзӧдлассӧ.

¹⁵ Ыжъясӧс моз найӧс йӧртасны пыдӧстӧминӧ, кулӧмыс кутас видзны найӧс, а асывнас веськыда олысьяс кутасны ыджыдавны на вылын. Найӧ вынтӧммасны да колясны пыдӧстӧминас.

¹⁶ Но Енмыс вештысяс меысь, мездас менӧ кулӧмыслӧн кабыр улысь.

¹⁷ Эн пов, кор кодкӧ озырмӧ, кор сылӧн керкаас содӧ озырлуныс.

¹⁸ Ӧд кулігас сійӧ нинӧм оз босьт аскӧдыс, сылӧн озырлуныс оз вӧтчы сы бӧрся.

¹⁹ Му вылас олігӧн сійӧ лыддьӧ асьсӧ шудаӧн, йӧзыс ошкӧны, мый сылӧн ставыс артмӧ,

²⁰ но кулӧм бӧрас сійӧ вуджас аслас батьяс дінӧ, кодъяс оз нин аддзывны югыдсӧ.

²¹ Весиг мортыс кӧ нималӧ, но олӧ мывкыдтӧма, сійӧ пемӧс моз тшӧтш кулӧ. Ошкӧм.