Псалтыр 47 - Коми Библия 2023

47 Псалом

¹ Сьыланкыв. Корей пиянлӧн псалом.

² Господь ыджыд! Ёна ошкӧй миянлысь Еннымӧс Сылӧн карын, Сылӧн вежа керӧс вылын!

³ Сион керӧс мича да джуджыд, став му пасьтала нимкодясьӧны сыӧн. Керӧслӧн войвывладорын сулалӧ ыджыд Ӧксылӧн карыс.

⁴ Сэні олысьяс тӧдӧны, мый Енмыс дорйӧ найӧс.

⁵ Ӧксыяс чукӧртчисны, медым сувтны Сионлы паныд.

⁶ Но карсӧ аддзигӧн найӧ шӧйӧвошисны, повзьӧмнысла бӧр пышйисны.

⁷ Полӧм-дзӧрӧм топӧдіс найӧс, кыдзи сьӧкыд дой топӧдӧ чужтысь аньӧс.

⁸ Енмӧй, асыв тӧлӧн Тэ жуглін налысь корабльяссӧ, кодъяс локтісны Фарсис карысь.

⁹ Мый йылысь ми кывлім, сійӧс и аддзылім Господь Саваофлӧн, миян Енлӧн, карысь. Енмыс зумыдмӧдас Ассьыс карсӧ нэмъяс кежлӧ.

¹⁰ Енмӧй, Тэнад крамын ми мӧвпалам Тэнад буралӧмыд йылысь.

¹¹ Енмӧй, Тэнсьыд нимтӧ тӧдӧны став му пасьталаыс, ошкӧмыс кыптӧ Тэныд став му пельӧсын. Тэнад веськыд киыд тырӧма веськыдлуннас.

¹² [Господьӧй,] Тэнад веськыда мыждӧмысь мед гажӧдчас Сион керӧс, мед нимкодясясны Иуда каръясын олысьяс.

¹³ Мунӧй, кытшовтӧй Сион кар гӧгӧр, лыддьӧй сылысь башняяссӧ.

¹⁴ Сюся видзӧдалӧй сылысь зумыд стенъяссӧ, ветлӧдлӧй изкарті, медым висьтавны Сион йылысь водзӧ чужысьяслы.

¹⁵ Ӧд Енмыс – нэмъяс кежлӧ миян Ен, Сійӧ нуӧдӧ миянӧс олӧм помӧдз.