Псалтыр 45 - Коми Библия 2023

45 Псалом

¹ Сьылысьясӧн веськӧдлысьлы. Корей пиянлӧн сьыланкыв. Ворсӧны аламот ворсанторйӧн.

² Енмыс – миянлы сайӧдчаніныс да выныс, Сійӧ тэрмасьӧ отсавны шог дырйи.

³ Та вӧсна ми огӧ полӧй, весиг муыс кӧ кутас вӧрны, керӧсъяс кӧ усясны саридз пыдӧсӧ,

⁴ весиг саридзса ваыс кӧ кыптас ыджыд шыӧн, керӧсъяс кӧ вӧрзясны сылӧн гызьӧмысь.

⁵ Визувтысь юяс гажӧдӧны Енлысь карсӧ, Медвылыссалысь вежа оланінсӧ.

⁶ Ачыс Енмыс кар шӧрас, карыс оз вӧрзьы, водз асывсянь Енмыс отсалӧ сылы.

⁷ Войтыръяс шызьӧны, юралӧмъяс киссьӧны, муыс сыркмунлӧ Медвылыссалӧн гӧлӧс шыысь.

⁸ Господь Саваоф миянкӧд, Яковлӧн Енмыс – миянӧс Дорйысьыс.

⁹ Локтӧй да видзӧдӧй Господьлысь уджъяссӧ, Сыӧн бырӧдӧм мувывса оланінъяс.

¹⁰ Став му пасьтала Сійӧ дугӧдіс тышъяс, чегъяліс ньӧввужъяс да шыяс, биын сотіс тарантасъяс.

¹¹ Господь висьталӧ: «Сувтыштлӧй да тӧдӧй, мый Ме – Енмыс. Менӧ вылӧ кыпӧдӧны войтыръяс пӧвстын, Менӧ ошкӧны став му пасьтала».

¹² Господь Саваоф миянкӧд, Яковлӧн Енмыс – миянӧс Дорйысьыс. Ошкӧм.