Псалтыр 44 - Коми Библия 2023

44 Псалом

¹ Сьылысьясӧн веськӧдлысьлы. Сьылӧны ”Шушан” шылад улӧ. Корей пиянлӧн сьыланкыв. Муслун йылысь.

² Менам сьӧлӧмысь петӧны мича кывъяс, ме сьыла ӧксы йылысь, кывъясӧй ворсӧдчӧны мичаа гижысьлӧн ки моз.

³ Ӧксыӧй, став йӧзыс пӧвстысь тэ медся мичаыс, тэнад вомысь петӧны мелі кывъяс, та вӧсна Енмыс бурсиис тэнӧ нэмъяс кежлӧ.

⁴ Вынаӧй, вӧняв коскад ассьыд шыпурттӧ, кышанӧс моз пасьтав ас вылад дзирдлунтӧ да вынтӧ.

⁵ Дзирдлуннад да выннад пет тышӧ, дорйы збыльсӧ, рамлунсӧ да веськыдлунсӧ. Тэнад веськыд киыд мед петкӧдлас шензьӧдана уджъяс.

⁶ Тэнад ньӧвъясыд ёсьӧсь, [вынаӧй,] найӧ сатшасны сьӧлӧманыс ӧксыӧс мустӧмтысьяслы, тэнад кок улӧ усясны войтыръяс.

⁷ Енлӧн юралан пуклӧсыс моз тэнад юралан пуклӧсыд лоӧ нэмъяс чӧж, тэнад юралан беддьыд – веськыдлун.

⁸ Веськыдлуныс тэныд муса, а лёксӧ тэ мустӧмтан. Та вӧсна тэнад Енмыд мавтыштіс тэнӧ нимкодьлунӧн мукӧд дорысь ёнджыка на.

⁹ Тэнад паськӧмыд ӧвтӧ чӧскыд дукӧн, смирна, алоэ да кассия дукӧн. Тэ олан слӧн лыысь вӧчӧм керкаын, тэнӧ гажӧдӧны шылада ворсанторъясӧн.

¹⁰ Тэнад керкаын олӧны нималана аньяс да ӧксыяслӧн нывъясыс, тэнад веськыдладорын пукалӧ офирса зарниӧн мичмӧдӧм ӧксы-ань.

¹¹ Кывзы, нылӧй, сюся кывзы! Вунӧд ассьыд войтыртӧ да бать керкатӧ.

¹² Тэнад мичлуныд мед кыскас тэ дінӧ ӧксыӧс. Копыртчыв сылы, ӧд сійӧ – тэнад ыджыдыд.

¹³ Тирса йӧз локтасны тэ дінӧ козинъясӧн, озыръяс кутасны виччысьны тэсянь буралӧм.

¹⁴ Ӧксы рӧдысь нылӧс мичмӧдӧма, сылӧн паськӧмыс зарниысь.

¹⁵ Серлӧдлӧм паськӧмӧн сійӧс нуӧдӧны ӧксы дінӧ, сы бӧрся мунӧны сылӧн нывъёртъясыс.

¹⁶ Найӧс вайӧдӧны долыда нимкодясьӧмӧн, гажӧдчигтырйи найӧ пырӧны ӧксылӧн керкаӧ.

¹⁷ Ӧксыӧй, тэнад пияныд кутасны ӧксыавны батьясыд пыдди, тэ пуктан найӧс юравны став му пасьталаыс.

¹⁸ Чужысьяссянь чужысьясӧдз кутасны казьтывны тэнсьыд нимтӧ, войтыръяс кутасны ошкыны тэнӧ нэмъяс чӧж.